ABŞ administrasiyası bir barel üçün 100 dollar və daha yüksək qiyməti “baza səviyyə” hesab edir, lakin qiymətin 200 dollara qədər arta biləcəyini də istisna etmir. Bu barədə “Politico” nəşri məlumat yayıb.
Nəşrin məlumatına görə, ABŞ prezidenti Maliyyə Nazirliyindən və enerji bazarının iri iştirakçılarından neft qiymətlərinin mümkün dinamikası ilə bağlı məlumat alıb. Hətta fövqəladə tədbirlərin tətbiqi də müzakirə olunub. Sənaye nümayəndələrindən biri mövcud vəziyyəti “tam səfərbərlik rejimi” kimi qiymətləndirib. Digər mənbə isə bildirib ki, ABŞ administrasiyası “enerji daşıyıcılarının qiymətini azaltmaq üçün bütün mümkün yolları nəzərdən keçirir”.
Ağ Evin nümayəndəsi isə öz növbəsində yaxın gələcək üçün neft qiymətlərinin “müzakirə edilməsi və ya proqnozlaşdırılması” barədə məlumatları təkzib edib.
Neft bazarı üzrə analitik Rori Conston hesab edir ki, Yaxın Şərqdəki münaqişənin yanacaq qiymətlərinə təsirini qiymətləndirmək hələ tezdir. Onun sözlərinə görə, “dalğa iki həftə ərzində ABŞ-yə çatacaq” və bu, istehlakçılar üçün “çox ağır olacaq”.
ABŞ və İsrailin İrana qarşı əməliyyatının başlanmasından bəri ABŞ-də benzinin qiyməti orta hesabla hər qallon üçün 1 dollar artıb. Dizel yanacağının qiyməti isə 3,75 dollardan 5,4 dollara yüksələrək 1,5 dollar artım göstərib.
ABŞ-də benzinin orta qiymətinin tarixi maksimumu 2022-ci ilin iyununda qeydə alınıb — o zaman bir qallonun qiyməti 5 dolları keçmişdi. Yanacaq qiymətlərinin dinamikasını izləyən “GasBuddy” portalının 31 mart tarixli məlumatına görə, ABŞ-də benzinin qiyməti 2022-ci ilin avqustundan bəri ilk dəfə olaraq 4 dollar həddini keçib.
