Kriptomilyarder Castin San, World Liberty Financial layihəsinə qarşı məhkəmə iddiası qaldırıb. O, şirkəti hədə-qorxu ilə pul tələb etməkdə və WLFI tokenlərini ələ keçirməyə yönəlmiş “qanunsuz sxem”də ittiham edir
Bu barədə Bloomberg yazır.
İddiaya görə, 2024 və 2025-ci illərdə Castin San layihənin 3 mlrd. WLFI tokenini almaq üçün ümumilikdə 45 mln. dollar investisiya edib. Bundan əlavə, o, layihəyə məsləhət dəstəyi göstərdiyinə görə daha 1 mlrd. WLFI tokeni əldə edib.
Castin San bildirir ki, World Liberty onun tokenlərini dondurub, onları yandırmaq və köçürmələri məhdudlaşdırmaq imkanı əldə edib. Həmçinin, onun sözlərinə görə, şirkət onu öz stabilkoininə investisiya qoymağa və layihəni təşviq etməyə məcbur etməyə çalışıb.
O, yüz milyonlarla dollar zərər gördüyünü, aktivlərinin yandırılması ilə hədələndiyini və hüquq-mühafizə orqanlarına müraciət ediləcəyi ilə şantaj edildiyini iddia edir. Castin San həmçinin layihənin maliyyə çətinlikləri yaşadığını qeyd edir.
İddiada tokenlərin blokdan çıxarılması, kompensasiya ödənilməsi və World Liberty tərəfindən onların istifadəsi və ya məhv edilməsinə qadağa qoyulması tələb olunur.
