Çinin süni intellekt çipləri istehsalçısı “Cambricon” şirkətinin səhmləri rüblük hesabatın açıqlanmasından sonra bir gün ərzində 20% artıb. Şanxay Fond Birjası məlumatlarına görə, şirkətin bazar kapitallaşması 716,8 milyard yuan ($104,9 milyard) səviyyəsinə çatıb.
Bir səhm üzrə qiymət gün ərzində şirkət üçün rekord səviyyə olan 1 699,96 yuan ($248,7)-a yüksəlib. Əvvəlki maksimum 27 avqust 2025-ci ildə 1 595,88 yuan səviyyəsində qeydə alınmışdı.
Hesabata əsasən, yanvar–mart aylarında “Cambricon”un xalis mənfəəti ötən ilin eyni dövrü ilə müqayisədə 185% artaraq 1 milyard yuan ($146,2 milyon) təşkil edib. Gəlir isə 160% artaraq 2,9 milyard yuan ($424 milyon) olub.
“Cambricon” 2016-cı ildə təsis edilib və süni intellekt üçün mikroprosessorlar istehsal edir. Şirkət 2022-ci ildə ABŞ Ticarət Nazirliyinin Sənaye və Təhlükəsizlik Bürosunun sanksiya siyahısına daxil edilib. Son illərdə isə Çin idxal çiplərini yerli analoqlarla əvəzləməyə çalışdıqca, şirkət sabit artım nümayiş etdirir.
2025-ci ildə “Cambricon”un gəliri əvvəlki illə müqayisədə 453% artaraq 6,5 milyard yuan ($943 milyon) olub. “Çinin Nvidia-sı” kimi tanınan şirkət 2020-ci ildə birjaya çıxdıqdan sonra ilk dəfə olaraq ötən il 2 milyard yuan ($300 milyon) mənfəət əldə edib.
