“Epex Spot” məlumatlarına görə, səhər saatlarında Almaniya və Fransada elektrik enerjisinin qiyməti -500 avro/meqavat-saat səviyyəsinə qədər enib. Bəzi ölkələrdə isə elektrik enerjisinin qiyməti günorta saatlarında belə mənfi olaraq qalıb. “ANE GmbH & Co. KG” şirkətinin qiymətləndirməsinə əsasən, bu tendensiya həftəsonu da davam edəcək. Bu vəziyyət sənaye istehlakının azalması nəticəsində enerji sistemində artıq elektrik yaranması ilə bağlıdır.
Cümə günü elektrik enerjisinin qiymətləri rekord aşağı səviyyələrə çatıb, xüsusilə Almaniya və Fransada mənfi qiymətlər daha nəzərəçarpan olub. Bu isə günəş enerjisinin yüksək istehsalının region ölkələrinin əksəriyyətində dövlət bayramları ilə eyni vaxta düşməsi ilə izah olunur.
Bərpa olunan enerji mənbələrinin populyarlığının artması Avropada mənfi elektrik qiymətlərinin daha tez-tez müşahidə olunmasına səbəb olur. Problemi enerji saxlama imkanlarının məhdudluğu və enerji şəbəkəsindəki dar boğazlar daha da dərinləşdirir, bu isə sistemin istehsal olunan bütün enerjini qəbul etməsinə mane olur. Nəticədə bəzi günəş elektrik stansiyaları müvəqqəti fəaliyyətini dayandırmağa məcbur qalır.
Bununla belə, qiymətlərin -100 avro/meqavat-saatdan aşağı düşməsi nadir hal olaraq qalır. “Bloomberg” tərəfindən “Epex Spot” məlumatları əsasında toplanan statistikaya görə, bu il Almaniyada belə hallar cəmi 17 saat, Fransada isə 15 saat müşahidə edilib.
“Bloomberg” proqnoz verir ki, cümə günü Almaniyada günəş enerjisi istehsalı təxminən 53 giqavat səviyyəsində — cümə axşamının rekord göstəricisinə çatacaq. Bu isə elektrik enerjisinə olan tələbi üstələyə bilər.
Almaniya, Fransa, Böyük Britaniya və İspaniya kimi ölkələrdə bayram günləri cümə və ya bazar ertəsinə təsadüf edir.
