ABŞ prezidenti Donald Tramp 2026-cı ilin birinci rübündə Amerikanın ən iri şirkətlərinin səhmləri və istiqrazlarına on milyonlarla dollar sərmayə yatırıb. Bu barədə ABŞ Hökumət Etikası İdarəsinə təqdim edilmiş maliyyə açıqlamasına istinadən “Bloomberg” yazıb.
100 səhifədən çox olan sənəddə Trampın fond bazarında etdiyi alış və satış əməliyyatları göstərilib. “Bloomberg” qeyd edir ki, əməliyyatların hansı hissəsinin məhz səhmlərlə bağlı olduğu tam aydın deyil. ABŞ Konqresi üzvlərindən fərqli olaraq, Tramp hesabatlarında ticarət etdiyi aktivlərin siniflərini açıqlamağa borclu deyil.
Cədvəldə əməliyyatların həcmi qiymət diapazonları ilə göstərilib. Tramp hər biri üzrə $1 milyon–$5 milyon aralığında “Nvidia”, “Amazon”, “Microsoft”, “Boeing”, “Oracle”, “Broadcom”, “Apple” və digər şirkətlərin qiymətli kağızlarını alıb. $500 min–$1 milyon aralığında isə “AMD”, “Alphabet” və bir sıra digər şirkətlərin səhmlərini əldə edib.
“Bloomberg” qeyd edir ki, son dövrdə Trampın qəbul etdiyi bəzi siyasi qərarlar açıq səhmdar şirkətlərlə kəsişib. Məsələn, “Nvidia” və “Boeing” rəhbərləri Trampın Çinə səfəri zamanı Amerika nümayəndə heyətinə daxil olublar. Trampın altı əməliyyatı “Intel” ilə bağlı olub: bundan əvvəl Ağ Ev şirkətin 10%-lik payının $9 milyarda alınması barədə razılıq əldə etmişdi.
“Netflix” və “Paramount Skydance” arasında “Warner Bros. Discovery” uğrunda rəqabət fonunda Tramp hər üç şirkətə investisiya yatırıb. Mart ayında o, “Warner Bros.”un kiçik payını alaraq buna ən azı $30 min xərcləyib, “Paramount Skydance” səhmlərinə isə $15 mindən çox sərmayə qoyub. Bundan əlavə, o, “Netflix” səhmlərini $500 minədək məbləğdə alıb və $5 milyonadək həcmdə satıb.
“Bloomberg”in məlumatına görə, Trampın ən iri satışları fevralın 10-da baş verib. Həmin gün o, üç texnologiya şirkətinin — “Microsoft”, “Amazon” və “Meta” səhmlərini $5 milyon–$25 milyon aralığında satıb. Bundan başqa, yanvarda Tramp “Vanguard” birja fondundakı payını ən azı $5 milyona satıb.
Ağ Ev “Bloomberg”in sorğusunu “Trump Organization”a yönləndirib. ABŞ prezidentinin şirkəti isə agentliyin sorğusuna cavab verməyib.
