ABŞ Prezidenti Donald Trump-ın İrana qarşı planlaşdırılan hərbi zərbələri ləğv etməsi və gərginliyin azalacağına dair ümidlərin artması fonunda neft qiymətləri cümə günü 2%-ə yaxın ucuzlaşıb.
Banker.az xəbər verir ki, Brent markalı neftin qiyməti 1.83 dollar (2%) azalaraq 88.55 dollara, WTI isə 1.60 dollar (1.8%) ucuzlaşaraq 86.11 dollara düşüb.
Tramp bildirib ki, İranla danışıqlarda irəliləyiş əldə olunub və Hörmüz boğazının yenidən gəmiçilik üçün açılmasını nəzərdə tutan sülh sazişi artıq bu həftəsonu imzalana bilər. Lakin İran tərəfi hər hansı razılaşma mətnini təsdiqləmədiyini açıqlayıb.
Buna baxmayaraq, vəziyyət gərgin olaraq qalır. İran Hörmüz boğazını bağladığını elan edib və koordinasiya olmadan keçmək istəyən bir tankerin qarşısını aldığını bildirib. ABŞ ordusu isə kommersiya gəmilərinin boğazdan keçməyə davam etdiyini qeyd edib.
ING analitikləri xəbərdarlıq ediblər ki, atəşkəs kövrək ola bilər və nüvə danışıqları uğursuz olarsa, gərginlik yenidən arta bilər. Onların fikrincə, əgər iyulun sonuna qədər neft axınları bərpa olunmasa, qiymətlər bir barel üçün 120–130 dollara yüksələ bilər.
Bu arada, OPEC+ 2026-cı il üzrə qlobal neft tələbatının artımı proqnozunu aşağı salıb.
