ABŞ Energetika Nazirliyi 2026-cı ilin yekunları üzrə Brent markalı neftin qiyməti ilə bağlı proqnozunu bir barel üçün 95,4 dollardan 81,9 dollara endirib. Bu barədə nazirliyin Enerji İnformasiyası Administrasiyasının (EIA) hesabatında bildirilib.
EIA-nın məlumatına görə, iyun ayında Brent neftinin orta qiyməti bir barel üçün 85 dollar təşkil edib. Bu, may ayı ilə müqayisədə 22 dollar azdır. ABŞ Energetika Nazirliyi dördüncü rübdə orta qiymətin 70 dollara enəcəyini gözləyir. Hesabatda qeyd olunur ki, 2027-ci il üçün Brent üzrə qiymət proqnozu da bir barel üçün 79,4 dollardan 64,8 dollara endirilib.
EIA 2026-cı il üçün OPEC+ ölkələrinin neft hasilatı ilə bağlı proqnozunu da yüksəldib. Göstəricinin sutkada 29,8 milyon barel olacağı gözlənilir ki, bu da illik ifadədə 3,5 milyon barel azalma deməkdir. Əvvəlki hesabatda EIA ilin yekununda hasilatın sutkada 4,8 milyon barel azalacağını proqnozlaşdırmışdı.
ABŞ Energetika Nazirliyi martın əvvəlində, Yaxın Şərqdə münaqişə başlayandan qısa müddət sonra Brent neftinin orta qiyməti ilə bağlı proqnozunu kəskin artırmışdı. Həmin vaxt proqnoz 34% artırılaraq bir barel üçün 57,69 dollardan 78,84 dollara qaldırılmışdı. İyunun 18-də ABŞ və İran münaqişənin nizamlanmasına dair memorandum imzalayıblar. Tərəflər hərbi əməliyyatları dayandırmaq və Hörmüz boğazından təhlükəsiz gəmiçiliyi təmin etmək barədə razılığa gəliblər.
