Braziliya ABŞ prezidenti Donald Tramp administrasiyasının tətbiq etdiyi yeni gömrük rüsumlarına cavab olaraq patent müdafiəsinin müvəqqəti dayandırılması və digər sərt tədbirləri nəzərdən keçirir.
Mənbələrin sözlərinə görə, hökumət əczaçılıq preparatları və kənd təsərrüfatı toxumları üzrə patent müdafiəsini müvəqqəti məhdudlaşdıra, həmçinin ABŞ-nin audiovizual şirkətlərinin dividend və royalti ödənişlərinə məhdudiyyət qoya bilər. Bundan əlavə, Braziliya Ümumdünya Ticarət Təşkilatında (ÜTT) ABŞ ilə ticarət mübahisəsini yenidən gündəmə gətirməyi planlaşdırır.
Bu addımlar prezident Luiz İnasiu Lula da Silvanın ABŞ-nin tədbirlərinə cavab olaraq tətbiq edəcəyini vəd etdiyi qarşılıqlılıq qanununa uyğundur. ABŞ çərşənbə günü Braziliyadan idxal olunan bir çox məhsula 25% gömrük rüsumu tətbiq edərək ölkəni ədalətsiz ticarət praktikasında ittiham edib.
Braziliyanın cavab tədbirləri yalnız idxalı deyil, həm də ABŞ şirkətlərinin əqli mülkiyyət hüquqlarını və audiovizual sektorun maraqlarını hədəf ala bilər. Rəsmilər hesab edirlər ki, bu yanaşma ABŞ-yə təzyiq göstərməklə yanaşı, daxili bazarda qiymət artımının qarşısını almağa kömək edəcək.
Mənbələrdən biri bildirib ki, son qərarı prezident verəcək, lakin sərt cavabın demək olar ki, qaçılmaz olduğunu vurğulayıb.
Digər mənbənin sözlərinə görə, Braziliya ötən il qarşılıqlılıq qanunu çərçivəsində hazırlanmış cavab tədbirlərinə yenidən baxacaq. Onların arasında ABŞ-nin audiovizual şirkətlərinin dividend və royalti ödənişlərinə məhdudiyyətlər də var.
Hökumət həmçinin əczaçılıq məhsulları və kənd təsərrüfatı toxumları üçün patent müdafiəsinin müvəqqəti dayandırılmasını nəzərdən keçirir.
Vitse-prezident Jeraldu Alkmim mətbuat konfransında bildirib ki, Lula qarşılıqlılıq qanununun tətbiqi ilə bağlı qərarı uyğun vaxtda verəcək. O, mümkün tədbirlərin təfərrüatlarını açıqlamayıb.
Alkmim vurğulayıb ki, qanun cəza və ya qisas məqsədi daşımır. Onun sözlərinə görə, bu, Braziliyanın, vətəndaşlarının və ölkə iqtisadiyyatının maraqlarını qorumaq üçün nəzərdə tutulmuş qanuni alətdir.
Maliyyə naziri Dario Durigan isə bildirib ki, hökumət avqustun əvvəlindən etibarən zərər çəkmiş sahələr üçün güzəştli kredit xətləri və digər dəstək tədbirlərini işə salmağı planlaşdırır. Bu proqram ötən il Trampın ilk rüsumlarından sonra tətbiq edilən dəstək mexanizminin davamı olacaq.
Durigan qeyd edib ki, bu dəfə dövlət daha az büdcə vəsaiti ayıracaq və fiskal hədəflərə sadiq qalacaq.
“Biz baş əyməyəcək və xarici maraqlara tabe olmayacağıq”, — deyə o bildirib.
Nazir əlavə edib ki, hökumət həm ABŞ, həm də Braziliyanın maraqlarına hörmətlə yanaşan digər ölkələrlə danışıqlara açıqdır.
Strategiyanın əsaslandırılması
Braziliya hakimiyyəti ABŞ mallarına əlavə rüsum tətbiq etməkdənsə, qarşılıqlılıq qanunu çərçivəsində tədbirlərə üstünlük verir. Onların fikrincə, bu yanaşma daxili tədarük zəncirinə daha az zərər vuracaq və inflyasiya riskini artırmayacaq.
ABŞ rəsmiləri Vaşinqtonun Braziliyanın cavab addımlarına uyğun olaraq öz siyasətini yenidən nəzərdən keçirə biləcəyini bildiriblər. Bu isə Braziliya ixracatçıları arasında narahatlıq yaradıb və onları satış bazarlarını şaxələndirməyə sövq edib.
İlin ilk yarısında Braziliyanın ABŞ-yə ixracı 13% azalıb, halbuki ölkənin ümumi ixracı 5,1% artıb.
Digər mənbənin məlumatına görə, Braziliya ötən il elektronika məhsullarına tətbiq edilən ABŞ gömrük rüsumları ilə bağlı ÜTT-də başladığı mübahisəni yenidən aktivləşdirəcək. Bu, ölkəyə ticarət mübahisələrinin həlli üzrə komissiyanın daha tez yaradılmasına imkan verəcək.
Əgər Braziliya ÜTT-də müsbət qərar əldə etsə, bu, onun beynəlxalq ticarət qaydaları çərçivəsində cavab tədbirləri görməsi üçün hüquqi mövqeyini daha da gücləndirəcək.
