Avropa İttifaqı Rusiyaya qarşı son sanksiyalar paketi ilə bağlı yaranmış çıxılmaz vəziyyətdən çıxış üçün ən azı üç mümkün ssenarini müzakirə etməyi planlaşdırır. Bu barədə məlumatlı mənbələrə istinadən Bloomberg yazıb.
2022-ci ildə Ukraynada müharibənin başlanmasından bəri Aİ-nin hazırladığı 21-ci sanksiyalar paketi ötən həftə bloklanıb. Buna səbəb Yunanıstanın Avropa şirkətlərinin Rusiya mənşəli mayeləşdirilmiş təbii qazı (LNG) üçüncü ölkələrə ötürmək imkanlarının məhdudlaşdırılmasına etirazını geri götürməməsi olub.
Bloomberg-in mənbələrinin sözlərinə görə, hazırda aşağıdakı variantlar müzakirə edilir:
– məhdudiyyətlərin tətbiqindən əvvəl 24 aylıq keçid dövrünün verilməsi;
– bu tədbirdən tamamilə imtina olunması;
– və ya bütövlükdə 21-ci sanksiyalar paketinin ləğvi.
Bundan əvvəl Aİ kompromis variant kimi qüvvədə olan müqavilələrin müddətinin uzadılmasına icazə verilməsini də nəzərdən keçirib. Mənbələrin bildirdiyinə görə, digər təkliflər razılaşdırılmasa belə, Rusiya nefti üçün qiymət tavanının dondurulması müddəti uzadıla bilər.
Ötən həftə Aİ-yə üzv dövlətlər Rusiya nefti üçün qiymət tavanını müvəqqəti olaraq – 23 iyuladək – bir barel üçün 44,10 dollar səviyyəsində saxlamaq barədə razılığa gəliblər. Səbəb tərəflərin daha geniş razılıq əldə edə bilməməsi olub. Qiymət tavanının dünya bazarında neft qiymətlərinin artımına uyğun şəkildə yüksəldilməsi nəzərdə tutulurdu.
Aİ üzvləri arasında danışıqlar gərgin keçib, çünki ölkələr öz iqtisadi maraqlarını qorumağa çalışırlar. Xüsusilə, keçmiş rusiyalı döyüşçülərin Aİ-yə girişinin qadağan olunması ilə bağlı planlar yumşaldılıb və təxirə salınıb, bəzi balıq növlərinin idxalına məhdudiyyət tətbiqi təklifləri isə gündəmdən çıxarılıb.
Mənbələrin məlumatına görə, Aİ səfirləri sanksiyalar paketinin müzakirəsini davam etdirmək üçün bu həftə yenidən bir araya gələcəklər.
