Dərman qiymətlərini kəskin artırması ilə məşhurlaşan Martin Şkreli yenidən ictimai diqqət mərkəzinə qayıdıb. İnvestorları aldatdığına görə dörd ildən artıq həbsdə qaldıqdan sonra o, YouTube-da maliyyə influenseri kimi yeni karyera qurur və demək olar ki, hər gün səhmləri təhlil etdiyi uzunmüddətli canlı yayımlar keçirir.
Şkreli 2015-ci ildə rəhbərlik etdiyi Turing Pharmaceuticals şirkətinin Daraprim preparatının hüquqlarını əldə etdikdən sonra onun qiymətini bir həbinə görə 13,5 dollardan 750 dollara qaldırması ilə qalmaqallı şöhrət qazanmışdı. Daraprim toksoplazmozun, o cümlədən immun sistemi zəif olan xəstələrin müalicəsində istifadə olunur.
İctimai qəzəbdən sonra Şkreli preparatın qiymətini endirəcəyini vəd etsə də, konkret məbləğ açıqlamamış, daha sonra isə bunun qısa müddətdə baş verməyəcəyini bildirmişdi. O iddia edirdi ki, 1953-cü ildən istehsal olunan preparatın təkmilləşdirilməsinə ehtiyac var və bunun üçün böyük maliyyə vəsaiti tələb olunur.
2017-ci ildə isə Şkreli iflasa uğramaqda olan hedc fondlarının vəziyyəti barədə investorları aldatmaqda təqsirli bilinib.
Hazırda o, özünü Pablo Pikasso ilə müqayisə edir, canlı yayımlarda izləyiciləri təhqir edir və eyni zamanda Bloomberg Terminal-a daha ucuz alternativ kimi təqdim etdiyi Godel adlı maliyyə proqramını reklam edir.
“Ən sevdiyim məşğuliyyət X platformasında çoxlu insanı qəzəbləndirəcək paylaşımlar etməkdir”, – deyə Şkreli bildirib.
İyulun əvvəlində keçirdiyi yayımlardan birində SpaceX, Intel və Moderna da daxil olmaqla bir sıra iri şirkətləri qeyd edən Şkreli daha çox kiçik biotexnologiya və kvant texnologiyaları şirkətlərini təhlil edib. O, bu analizləri əsasən Substack və X platformalarında dərc edib.
Ümumilikdə ən azı 12 belə material yayımlayan Şkreli həmin yazılarda bu şirkətlərin səhmlərinin niyə ucuzlaşmalı olduğunu ətraflı izah edib. Bloomberg-in məlumatına görə, onların səkkizi, o cümlədən eksperimental dərmanlar hazırlayan Capricor Therapeutics və Anavex Life Sciences şirkətlərinin səhmləri onun mənfi proqnozlarını dərc etdiyi gün 9%-45% arasında ucuzlaşıb.
Lakin uzunmüddətli nəticələr Şkrelinin proqnozlarının o qədər də uğurlu olmadığını göstərib. Təxminən bir il sonra həmin şirkətlərin səhmləri orta hesabla 40% bahalaşıb.
Bunun ən bariz nümunəsi Capricor Therapeutics olub. Şkrelinin şirkət əleyhinə mövqe tutduğunu açıqlamasından sonra səhmlər 19% ucuzlaşsa da, Duchenne əzələ distrofiyasının müalicəsi üçün hazırlanan eksperimental hüceyrə terapiyası Deramiocel üzrə müsbət sınaq nəticələrinin açıqlanmasından sonra iki həftədən də az müddətdə dörd dəfədən çox bahalaşıb.
O vaxtdan bəri şirkətin səhmləri 300%-dən çox artımını qoruyub saxlayır və Bloomberg-in izlədiyi bütün 10 analitik bu səhmləri almağı tövsiyə edir.
