Beynəlxalq reytinq agentliyi “Moody’s” Azərbaycanın və emitentlə əlaqəli digər reytinqlər üzrə dövri baxışını tamamlayıb.
Banker.az Agentliyə istinadən xəbər verir ki,9 iyul 2026-cı il tarixində keçirilən reytinq komitəsində ölkənin reytinqlərinin mövcud metodologiyalara və son iqtisadi inkişaflara uyğunluğu yenidən qiymətləndirilib. Moody’s vurğulayıb ki, bu sənəd reytinq qərarı deyil və yaxın dövrdə reytinq dəyişikliyinin olacağına işarə etmir.
Moody’s qeyd edib ki, Azərbaycanın “Baa3” uzunmüddətli emitent reytinqi hökumətin güclü xalis kreditor mövqeyi ilə dəstəklənir. Agentliyin qiymətləndirməsinə görə, Dövlət Neft Fondunun (SOFAZ) idarə etdiyi iri maliyyə aktivləri dövlət üçün əhəmiyyətli maliyyə buferi yaradır, likvidlik və xarici riskləri azaldır. Eyni zamanda, pul-kredit və makroiqtisadi siyasət çərçivəsinin təkmilləşdirilməsi xarici mövqenin və maliyyə sisteminin dayanıqlığını gücləndirir, fiskal ehtiyatlardan səmərəli istifadə isə büdcə və dövlət borcu göstəricilərinin pisləşməsini məhdudlaşdırır.
Bununla yanaşı, Moody’s uzunmüddətli institusional və idarəetmə zəifliklərinin iqtisadi rəqabət qabiliyyətini məhdudlaşdırdığını bildirib. Agentliyin fikrincə, Ermənistanla münasibətlər gərgin olaraq qalsa da, yaxşılaşma meyli geosiyasi riskləri azaldır. Həmçinin iqtisadiyyatın neft-qaz sektorundan yüksək asılılığı şoklara qarşı dayanıqlığı zəiflətsə də, iqtisadi şaxələndirmə istiqamətində irəliləyiş müşahidə olunur.
Moody’s hesab edir ki, 2026-cı ildə Azərbaycanın iqtisadi artımı zəif olaraq qalır. Belə ki, ilin birinci rübündə real ÜDM illik müqayisədə 0,3% azalıb, ilk beş ayda isə iqtisadiyyat ötən ilin eyni dövrü ilə müqayisədə dəyişməyib. Agentlik neft hasilatının azalmasının qeyri-neft sektorundakı artımla demək olar ki, kompensasiya edildiyini qeyd edib. Tikinti sektorunda əvvəlki illərdə bərpa işlərinin yaratdığı artım tempinin zəiflədiyi, informasiya-kommunikasiya texnologiyaları, turizm və emal sənayesinin isə iqtisadiyyatı dəstəklədiyi vurğulanıb. Moody’s 2026-cı il üzrə iqtisadi artımın təxminən 1,5%, orta müddətli dövrdə isə 2-2,5% olacağını proqnozlaşdırır.
Agentliyin qiymətləndirməsinə görə, Azərbaycanın fiskal mövqeyi qeyri-neft büdcə kəsirinin azaldılmasına yönəlmiş orta müddətli siyasət və qeyri-neft gəlirlərinin artması hesabına güclənir. Əvvəllər münaqişədən zərər çəkmiş ərazilərin bərpasına yönələn xərclərin tədricən azalması da bu prosesə dəstək verir. “Moody’s” bildirib ki, SOFAZ-ın aktivləri 2025-ci ildə ÜDM-in 97%-nə çataraq oxşar reytinqə malik ölkələr arasında ən yüksək göstəricilərdən biri olub. Agentlik daha yüksək neft qiymətlərinin 2026-cı ildə əlavə gəlirlər yaradacağını, SOFAZ-ın aktivlərini artıracağını və hökumətin şoklara qarşı dayanıqlığını daha da gücləndirəcəyini gözləyir. “Moody’s” həmçinin Azərbaycanla Ermənistan arasında iqtisadi əməkdaşlığın genişlənməsi, regional nəqliyyat dəhlizləri üzrə irəliləyiş və sülh prosesinə beynəlxalq dəstəyin geosiyasi riskləri azaltdığını, baxmayaraq ki, hələlik rəsmi sülh sazişinin ratifikasiya edilmədiyini qeyd edib.
