Visa biznesin “səmərəliliyini artırmaq” üçün işçilərinin 7%-ni ixtisar edəcək. Bu barədə şirkətin baş direktoru Rayan Makinerni əməkdaşlara göndərdiyi daxili məktubda məlumat verib, Bloomberg yazır.
İxtisarların əsas hissəsi texnologiya və məhsul komandalarını əhatə edəcək. Ümumilikdə Visa-nın təxminən 2 600 əməkdaşı, yəni şirkət heyətinin 7%-i işdən çıxarılacaq.
Makinerni bildirib ki, qərarın məqsədi şirkətin fəaliyyətinin səmərəliliyini artırmaq və resursları “ən perspektivli” istiqamətlərə yönəltməkdir. O əlavə edib ki, Visa təkrarlanan işləri azaltmaq və məhsulların hazırlanmasını sürətləndirmək üçün süni intellektdən istifadəni genişləndirir.
Şirkət ixtisarlar hesabına qənaət edilən vəsaiti kommersiya həllərinə və əlavə xidmətlərin inkişafına yenidən investisiya etməyi planlaşdırır. Prioritet istiqamətlər arasında steyblkoinlər və sərhədlərarası ödənişlər yer alır.
Bloomberg qeyd edir ki, Visa-dakı ixtisarlar fintex sənayesində müşahidə olunan daha geniş tendensiyanın bir hissəsidir. Twitter-in həmtəsisçisi Cek Dorsinin təsis etdiyi Block şirkəti 2026-cı ilin fevralında süni intellektin inkişafı fonunda əməkdaşlarının 40%-dən çoxunu ixtisar edəcəyini açıqlamışdı. Xatırladaq ki, 2026-cı ilin mayında The Wall Street Journal PayPal-ın işçilərinin sayını 20%-dək azaltmağı planlaşdırdığını yazmışdı.
