2026-cı ilin birinci yarısı İsveçrənin Glencore şirkəti üçün Rusiya ilə Ukrayna arasında müharibənin başladığı dövr qədər uğurlu olub. Şirkətin treydinq, yəni “marketinq” bölməsi ABŞ ilə İran arasındakı müharibənin yaratdığı əlverişli bazar şəraiti fonunda əməliyyat mənfəətini iki dəfə artıraraq 3,3 milyard dollara çatdırıb.
Bu, mis və kömür də daxil olmaqla böyük həcmdə öz hasilatını həyata keçirən şirkətin ümumi mənfəəti deyil. Glencore-un tam maliyyə hesabatı yalnız gələn həftə açıqlanacaq. Bununla belə, digər iri enerji treyderləri də oxşar nəticələr göstəriblər. Trafigura və Mercuria da mənfəətlərini iki dəfə artırıblar.
Müharibədən əvvəl İsveçrə treyderinin Rusiya ilə sıx əlaqələri var idi. Şirkət “RussNeft” və “Rosneft”də paya malik idi, həmçinin “Rosneft” və “Rusal”la uzunmüddətli müqavilələr bağlamışdı. Glencore Rusiya ilə fəaliyyətini əsasən 2022-ci ilin sonunadək dayandırsa da, həmin il treydinqdən 6,4 milyard dollar mənfəət əldə etmişdi.
Hesabatda ən diqqətçəkən məqam Glencore-un ilin sonunadək treydinq nəticələri ilə bağlı proqnoz verməməsidir. Trafigura da Yaxın Şərqdə qeyri-müəyyənliyin yüksək olduğunu və geosiyasi şəraitdə məsuliyyətli proqnoz verməyin praktiki olaraq mümkün olmadığını bildirmişdi.
