Uorren Baffetə məxsus Berkshire Hathaway investisiya holdinqinin səhmləri son səkkiz ayın ən yüksək səviyyəsinə yüksəlib. CNBC-nin məlumatına görə, ötən həftə B sinfinə aid səhmlərin qiyməti 512,37 dollara, A sinfinə aid səhmlərin qiyməti isə 768 010 dollara çatıb. Bu, ötən ilin noyabr ayının sonundan bəri qeydə alınan ən yüksək göstəricidir.
Artıma baxmayaraq, Berkshire səhmlərinin qiyməti hələ də 2025-ci ilin mayında qeydə alınmış tarixi maksimumdan təxminən 5% aşağıdır. Həmin rekord Uorren Baffetin baş direktor vəzifəsindən ayrılmaq planını açıqlamasından qısa müddət əvvəl qeydə alınmışdı.
Analitiklər səhmlərin gələcək artım potensialının qalmaqda olduğunu bildirirlər. Barron’s nəşrinin məlumatına görə, Berkshire səhmlərinin dinamikası hələlik S&P 500 indeksindən geri qalır. Bununla belə, şirkət son iki ay ərzində bu fərqin yarıdan çoxunu aradan qaldıra bilib.
Berkshire-in ən iri aktivlərinin güclü nəticələri də səhmlərin qiymətinə əlavə dəstək verir. İlin əvvəlindən Apple səhmləri 13,6%, güclü maliyyə hesabatı və proqnozun yüksəldilməsindən sonra Coca-Cola səhmləri 25%, Bank of America səhmləri isə 12,6% bahalaşıb.
UBS analitiklərinin Berkshire səhmləri üzrə hədəf qiyməti yüksəltməsi də investorlar üçün müsbət amil olub. Analitiklər “almaq” tövsiyəsini qüvvədə saxlayıb və B sinfinə aid səhmlər üzrə hədəf qiyməti 570 dollardan 585 dollara qaldırıblar. Onlar şirkətin maliyyə göstəricilərinin gələcəkdə də yaxşılaşacağını gözləyirlər.
İnvestorlar indi Berkshire Hathaway-in avqustun 8-də açıqlanması gözlənilən ikinci rüb üzrə maliyyə hesabatını gözləyirlər. Analitiklər, həmçinin genişmiqyaslı səhm geri alışının təsdiqlənəcəyinə ümid edirlər. Barron’s-un hesablamalarına görə, rüb ərzində geri alınan səhmlərin ümumi dəyəri təxminən 11 milyard dollar təşkil edə bilər.
