Amazon-un qurucusu Ceff Bezosun daxil olduğu investor konsorsiumu İngiltərənin “Liverpul” futbol klubunun azlıq payını Boston Red Sox-un sahibi Fenway Sports Group-dan almağa yaxındır. The Wall Street Journal yazır ki, söhbət klubun 30%-lik payından gedir. Paket 1,35 milyard funt sterlinq, yəni təxminən 1,8 milyard dollar dəyərində qiymətləndirilir.
Sövdələşmə baş tutarsa, bu, Bezosun futbol klubuna ilk investisiyası olacaq. Bununla belə, razılaşma hələ yekunlaşmayıb və baş tutmaya da bilər. Bezos daha əvvəl NFL komandalarında pay almaq imkanını nəzərdən keçirsə də, həmin danışıqlar real sövdələşmə ilə nəticələnməyib.
“Liverpul” Avropanın ən uğurlu futbol klublarından biri olaraq qalır. Klub maliyyə baxımından da ən güclülər sırasındadır. Deloitte Football Money League-in son reytinqində “Liverpul” 836,1 milyon avro, yəni 954 milyon dollar gəlirlə beşinci yeri tutub.
Gəlirdəki artımın bir hissəsi klubun ev stadionu olan “Enfild”in yenidən qurulması ilə əlaqələndirilir. Rekonstruksiyadan sonra stadionda daha çox premium yer yaradılıb və bu yerlər oyun günlərində kluba əlavə gəlir gətirir.
Konsorsiuma kimlər daxildir?
Konsorsiuma hindistanlı polad maqnatı Lakşmi Mittalın kürəkəni Amit Bhatiya rəhbərlik edir. O, daha əvvəl İngiltərənin “Queens Park Rangers” futbol klubunda pay sahibi olub.
Bezosun sövdələşməyə SpaceX-in iri investorlarından biri olan K5 Global vasitəsilə qoşulacağı gözlənilir. K5 Global Maykl Kayvs və Brayan Baum tərəfindən idarə olunur. Məlumata görə, sövdələşmə çərçivəsində ən böyük investisiyanı məhz K5 Global yatırmalıdır.
Konsorsium iştirakçıları arasında Facebook-un həmtəsisçisi Eduardo Saverin də var.
Mənbələrin sözlərinə görə, sövdələşmənin şərtləri konsorsiuma gələcəkdə “Liverpul”a əlavə investisiyalar yatırmaq imkanı da verir.
Bu niyə vacibdir?
Potensial investisiya amerikalı investorların Avropa futboluna artan marağını əks etdirir. Sky Sports-un məlumatına görə, ötən mövsüm İngiltərə Premyer Liqasının 20 klubundan 13-də amerikalı səhmdarlar olub.
Bunun səbəblərindən biri ABŞ-də idman aktivlərinin çox baha olmasıdır. Futbol maliyyəsi üzrə ekspert Kiran Maquayrın hesablamasına görə, NFL klubunun alınması 5–10 milyard dollara başa gələ bilər.
NFL, NBA, MLB və NHL klubları məhdud sayda komandadan ibarət qapalı franşiza sistemində fəaliyyət göstərir və mövcud sahiblər onları satmağa tələsmirlər. Bu baxımdan Avropa futbolu investorlar üçün daha əlçatan alternativ kimi görünür.
ABŞ-də futbolun populyarlığının artması da mühüm amildir. Nielsen-in Sky Sports tərəfindən istinad edilən məlumatına görə, 2025-ci ildə amerikalılar futbol yayımlarına ümumilikdə təxminən 80 milyard dəqiqə baxıblar. ABŞ sakinlərinin təxminən 33%-i qarşıdakı 18 ay ərzində futbola maraqlarının artacağını gözləyir.
Britaniya futbolu isə investisiya üçün ən əlverişli bazarlardan biri olaraq qalır. Digər böyük Avropa liqalarında müəyyən məhdudiyyətlər mövcuddur. Almaniyada “50+1” qaydası özəl investorların klublar üzərində nəzarətini məhdudlaşdırır. Fransada media hüquqlarının satışındakı problemlər bazarın cəlbediciliyini azaldıb. İspaniyada isə “Barselona” və “Real Madrid” də daxil olmaqla bir sıra iri klublar tarixən üzvlərinə məxsus təşkilatlar kimi fəaliyyət göstərir.
