Google 2026-cı ilin mayında fəaliyyətini dayandıran ABŞ-nin iri loukosterlərindən Spirit Airlines-in aktivlərinin satışı üzrə hərracda qalib gəlib. Şirkət aviaşirkətin daxili biznes məlumatları üçün təxminən 10 milyon dollar təklif edib. Axios yazır ki, sövdələşmə hələ məhkəmə tərəfindən təsdiqlənməlidir.
Google-un əldə etdiyi məlumatlara Spirit Airlines əməkdaşlarının elektron məktubları, Microsoft Teams yazışmaları, elektron cədvəllər və təqvimlər daxildir. Bundan əlavə, paketə marketinq materialları, layihələrin idarə olunması sənədləri, maliyyə məlumat bazaları, audit hesabatları və təqdimatlar da daxil edilib.
Məlumatlar Google-a təqdim edilməzdən əvvəl anonimləşdiriləcək. Müştərilər və onların şəxsi məlumatları bazadan çıxarılacaq. Ümumilikdə Google təxminən 100 milyon elektron məktub və 500 milyon çat mesajı əldə edəcək.
Spirit Airlines 1964-cü ildə yükdaşıma aviaşirkəti kimi yaradılıb. Şirkət sərnişin daşımalarına 1980-ci illərdə başlayıb, ən sürətli inkişaf dövrünü isə 2010-cu illərdə yaşayıb. Spirit sərnişinləri minimal baza qiymətləri ilə cəlb edirdi, əl yükündən başlayaraq müxtəlif əlavə xidmətlər isə ayrıca ödəniş tələb edirdi.
Spirit Airlines 1 may 2026-cı ildə dövlət və kreditorlardan maliyyələşmə əldə edə bilmədiyi üçün fəaliyyətini dayandırıb. Şirkət bağlanmazdan əvvəl ikinci dəfə üzləşdiyi iflas prosesindən çıxmağa çalışırdı.
Aviaşirkət sonuncu dəfə 2019-cu ildə mənfəət əldə edib, sonrakı illərdə isə davamlı zərər qeydə alıb. Vəziyyəti aviasiya yanacağının bahalaşması və digər amillər daha da ağırlaşdırıb.
