Azərbaycanda əhalinin yaşlanması sürətlənir. 2026-cı ilin əvvəlinə ölkədə 65 və yuxarı yaşda olan əhalinin sayı 1 milyon 86,4 min nəfərə çatıb.
Dövlət Statistika Komitəsinin məlumatlarına görə, 2025-ci ilin əvvəlində bu yaş qrupuna daxil olanların sayı 1 milyon 12,3 min nəfər təşkil edirdi. Beləliklə, cəmi bir il ərzində 65+ yaşlı əhalinin sayı 74,1 min nəfər və ya təxminən 7,3% artıb.
Uzunmüddətli dinamika isə daha nəzərəçarpandır. 2000-ci ildə Azərbaycanda 65 və yuxarı yaşda cəmi 419,5 min nəfər yaşayırdı. 2026-cı ilin əvvəlində bu göstərici 1 milyon 86,4 min nəfərə yüksəlib. Başqa sözlə, 26 il ərzində yaşlı əhalinin sayı təxminən 2,6 dəfə artıb.
Demoqrafik yük göstəricisi də əhəmiyyətli dərəcədə yüksəlib. 2000-ci ildə 15–64 yaşlı hər 1000 nəfərə 83 nəfər 65+ yaşlı düşürdüsə, 2026-cı ilin əvvəlində bu göstərici 152 nəfərə çatıb.
Son illərdə artım xüsusilə sürətlənib. 2020-ci ilin əvvəlində 65+ yaşlıların sayı 722,2 min nəfər olduğu halda, altı il ərzində göstərici 364,2 min nəfər və ya 50%-dən çox artaraq 1 milyon 86,4 min nəfərə yüksəlib.
Bu dinamika Azərbaycanın yaş strukturunun tədricən dəyişdiyini və yaşlı əhalinin iqtisadi fəal yaş qrupuna nisbətinin artdığını göstərir.
