Çikaqo birjasında buğda fyuçerslərinin qiyməti Rusiya-Ukrayna müharibəsinin daha da kəskinləşməsi və Qara dəniz üzərindən tədarükdə yeni fasilələrlə bağlı narahatlıqlar fonunda kəskin artıb.
Bloomberg-in məlumatına görə, çərşənbə günü buğdanın qiyməti 6,4 faiz yüksəlib. Avqust ayı ərzində isə artım 18 faizə çatıb. Nəticədə buğdanın qiyməti son üç ilin ən yüksək səviyyəsinə qalxıb.
Rusiya və Ukrayna birlikdə dünya buğda ixracının dörddə birindən çoxunu təmin edir. Bu ölkələrdən tədarükün pozulması Afrika, Asiya və Yaxın Şərqdəki idxalçı ölkələr üçün ciddi problemlər yarada bilər.
Artıq alıcılar daha bahalı tədarük imkanlarına malik Avstraliya və Argentina bazarlarına yönəlməyə başlayıblar.
Ekspertlər hesab edirlər ki, Qara dənizdə vəziyyətin daha da pisləşməsi qlobal taxıl bazarında yeni bahalaşma dalğasına və ərzaq inflyasiyasının sürətlənməsinə səbəb ola bilər.
