Ötən ilin böyük hissəsində Alphabet Inc. səhmləri iri texnologiya şirkətləri arasında liderlərdən biri olub. İnvestorlar məhz bu şirkətin süni intellekt bumundan ən çox faydalanacaq oyunçulardan biri olacağına mərc edirdilər.
Alphabet səhmləri mayın 13-də tarixi maksimuma çatmışdı. Bundan əvvəlki 12 ay ərzində səhmlər 150%-dən çox bahalaşmış, həmin dövrdə S&P 500 indeksinin ən yaxşı nəticə göstərən 25 şirkəti sırasına daxil olmuş və texnologiya nəhənglərindən ibarət “Möhtəşəm yeddilik”dəki digər şirkətləri əhəmiyyətli dərəcədə qabaqlamışdı. Lakin Bloomberg yazır ki, o vaxtdan etibarən dinamika dəyişib. Buna şirkətdə “beyin axını” ilə bağlı suallar və Alphabet-in süni intellekt sahəsində mövqelərini itirməsi ilə bağlı narahatlıqlar səbəb olub.
Hazırda şirkətin səhmləri pik səviyyədən 15% aşağıdadır. Alphabet bu müddətdə 692 milyard dollar bazar kapitallaşması itirib və S&P 500 indeksini ən çox aşağı çəkən ikinci şirkətə çevrilib.
Satış dalğasının əsas səbəbləri Alphabet-in süni intellekt liderliyi uğrunda yarışdakı mövqeyinin zəifləməsi, süni intellekt infrastrukturu üçün yüksək xərclər və yeni Gemini modelinin buraxılışının gecikməsidir. Bütün bunlar investor əhval-ruhiyyəsinə mənfi təsir göstərib.
Bir neçə ay əvvəl Google iki aparıcı əməkdaşını itirib. Onlardan biri Anthropic PBC-yə, digəri isə OpenAI-a keçib. Ayın əvvəlində Google-un süni intellekt strategiyasının formalaşmasında əsas rol oynamış Ceff Din şirkətdən ayrılaraq öz startapını yaratmaq qərarına gəlib və bir neçə həmkarını da özü ilə aparıb.
Demis Hassabis isə Google DeepMind süni intellekt tədqiqat laboratoriyasının baş direktoru vəzifəsindən ayrılaraq direktorlar şurasının sədri postuna keçib. Bu dəyişikliklər avqustun 5-də Alphabet səhmlərinin 4% ucuzlaşmasına səbəb olub və şirkət bir ticarət sessiyası ərzində 186 milyard dollar bazar kapitallaşması itirib.
Bununla belə, Alphabet-də kadr axını ilə bağlı problemlər aysberqin yalnız görünən hissəsidir. Şirkət üçün daha aktual məsələ onun ən güclü süni intellekt modeli Gemini 3.5 Pro-nun hazırlanmasındakı gecikmələrdir. Model qrafikdən geri qalır.
Şirkət xüsusilə proqramlaşdırma imkanlarını yaxşılaşdırmaq üzərində işləyir. Bu sahədə Alphabet artıq Anthropic və OpenAI-dan geri qalan şirkət kimi qiymətləndirilir. Google iki həftə əvvəl yeni Gemini 3.7 Flash modelini təqdim edib, lakin Gemini 3.5 Pro-nun nə vaxt istifadəyə veriləcəyi barədə heç bir məlumat açıqlamayıb.
Alphabet isə öz növbəsində tərəqqinin sürətlə davam etdiyini bildirir.
“Bizim süni intellekt üzrə inkişaf tempimiz və tətbiq sürətimiz rekord səviyyədədir. Modelləri bir neçə həftəlik intervallarla yeniləyirik. Gemini 3.7 Flash indiyədək ən sürətlə böyüyən modelimiz olub, Gemma isə 1 milyard yüklənmə həddini keçib”, – Google nümayəndəsi bildirib.
Alphabet səhmlərindən kapital axınının bir hissəsi adi bazar rotasiyası ilə də izah olunur. Məsələn, Microsoft Corp. səhmləri iyulun sonundan etibarən 25%-dən çox bahalaşıb. Buna şirkətin maliyyə hesabatında bulud biznesində son dörd ilin ən sürətli artımının göstərilməsi səbəb olub.
Alphabet səhmləri isə iyulun sonunda maliyyə hesabatının açıqlanmasından sonra ucuzlaşıb. İnvestorlar şirkətin yüksək kapital xərclərindən və mənfi sərbəst pul axınından narazı qalıblar.
