Neftin qiyməti Yaxın Şərqdə gəmilərə hücumların artacağı təqdirdə barel üçün 120 dollara qədər yüksələ bilər.
Banker.az Bloomberg-ə istinadən xəbər verir ki, bu barədə ABŞ-ın Nyu-York şəhərində yerləşən “Goldman Sachs Group”un əmtəə bazarları üzrə qlobal tədqiqatlar bölməsinin həmsədri Daan Struyven bildirib.
“Son günlər baş verən hadisələr gəmiçilikdə fasilələrin genişlənməsi və dərinləşməsi riskinin əhəmiyyətli olduğunu göstərir”, – Struyven deyib.
Neftin qiyməti iyuldan bəri ən yüksək səviyyəyə qalxıb. Buna ABŞ və İran arasında Hörmüz boğazı ilə bağlı yaranmış dalan səbəb olub. Son günlər ABŞ İran tankerlərinə zərbələr endirib, Tehran isə boğazın kənarında yeni məhdud giriş zonası yaradıldığını açıqlayıb.
Struyvenin sözlərinə görə, Fars körfəzindən neft ixracı normallaşarsa, qiymət 80 dollara qədər geriləyə bilər.
“Goldman Sachs” investorları geosiyasi risklərdən qorunmaq üçün təbii qaz və neft məhsullarında uzun mövqelər açmağa tövsiyə edir. Struyven qeyd edib ki, təklif şokları bu bazarlarda neft bazarından daha güclüdür.
Onun sözlərinə görə, Çin yüksək qiymətlərə cavab olaraq idxalı məhdudlaşdırmaqla neft bazarında “sabitləşdirici qüvvə” rolunu oynamağa davam edəcək. Lakin təbii qaz və neft məhsulları bazarında Çinin belə bir rolu yoxdur.
