Azərbaycan Respublikasının Mərkəzi Bankı, Azərbaycan Respublikasının Prezidenti yanında Elmin İnkişafı Fondu və Almaniya Beynəlxalq Əməkdaşlıq üzrə Əmanət Kassaları Fondu “Gənc alimlər və maliyyə savadlılığı” birgə mükafat müsabiqəsinə “2 Fevral – Gənclər Günü”ndə start verilir.
Müsabiqənin məqsədi Azərbaycanda iqtisadi və maliyyə savadlılığının artması, maliyyə savadlılığının ictimai dəyər kimi tanınması və insanların davranışlarında müvafiq dəyişiklik yaratmasına yönəlmiş, gənc alim və mütəxəssislər tərəfindən müsabiqə müddətində yazılmış orijinal məqalələrin və aprobasiyasının qiymətləndirilməsi, mükafatlandırılması və onların fəaliyyətinin stimullaşdırılmasıdır. Məqalələr aşağıdakı prioritet mövzular üzrə olmalıdır:
- Maliyyə savadlılığı və onun effektiv tədrisi yolları;
- Gənclərin maliyyə maarifləndirilməsi üçün model və yanaşmalar;
- Maliyyə maarifləndirilməsinin insanların maliyyə davranışlarına təsiri.
Müsabiqə sənədlər 12 fevral 2017-ci il tarixindən başlayaraq qəbul olunacaq. Sənədlərin son qəbul günü 25 aprel 2017-ci il saat 17.00-dır. Müsabiqənin gedişatı ilə bağlı məlumatlar Azərbaycan Respublikası Mərkəzi Bankının (www.cbar.az) və Azərbaycan Respublikasının Prezidenti yanında Elmin İnkişafı Fondunun (www.sdf.gov.az) rəsmi İnternet səhifələrində yerləşdiriləcək.
Maliyyə savadlılığı sahəsində dərc olunmuş və qalib olaraq seçilmiş ən yaxşı məqalələrin üç nominasiya üzrə diplom və pulla mükafatlandırılması nəzərdə tutulmuşdur. Nəticələr 2017-ci ilin may ayının ilk 10-günlüyündə açıqlanacaq, xüsusi təqdimat mərasimində qaliblərə mükafatlar təqdim ediləcəkdir.
Müsabiqənin keçirilməsi haqqında ətarflı məlumat Azərbaycan Respublikasının Prezidenti yanında Elmin İnkişafı Fondunun (www.sdf.gov.az) rəsmi İnternet səhifəsindən əldə oluna bilər.
