ABB-nin İdarə Heyətinin sədri Abbas İbrahimovun rəhbərlik etdiyi nümayəndə heyəti Özbəkistanda işgüzar səfərdə olub.
Banker.az xəbər verir ki, bu barədə Abbas İbrahimov özünün sosial mediadakı hesablarında məlumat paylaşıb.
ABB təmsilçiləri səfər çərçivəsində Özbəkistanın Baş nazirinin müavini Cəmşid Xocayev, İnvestisiya, sənaye və ticarət naziri Ləziz Qüdrətov, Özbəkistan Mərkəzi Bankının sədr müavinləri Behzod Həmrəyev və Abror Mirzəalimovla, eləcə də bu ölkədə fəaliyyət göstərən müxtəlif bankların, şirkətlərin rəhbərləri ilə görüşlər keçiriblər.
Görüşlərdə ölkənin maliyyə ekosistemi, Özbəkistanın aparıcı banklarının və mövcud fintek şirkətlərinin fəaliyyəti, sektorun digər əsas oyunçuları ilə bağlı müzakirələr aparılıb.
ABB-nin Özbəkistanın maliyyə insitutları ilə əməkdaşlıq imkanları dəyərləndirilib, gələcəkdə bu bazarda iştirak perspektivlərinə nəzər salınıb, Bankın ölkələrimiz arasında iqtisadi əlaqələrin inkişafına verə biləcəyi mümkün töhfələrə diqqət yönəlib.
İşgüzar səfərdə ABB-nin İdarə Heyəti sədrinin müavinləri Taleh Tahirli, Nəbi Əliyev və Bankın Baş direktoru Nihat Şenyuva da iştirak edib.
