ABB-nin səhmlərinə abunə yazılışının başlanmasından ötən 55 gün ərzində ABB səhmlərinə 15 000-dən çox investor tərəfindən 20 000-dən artıq sifariş yerləşdirilib. Təkcə son həftə ərzində 4 minə yaxın yeni investor cəlb edilib. Bu, rekord göstəricidir.
Banker.az xəbər verir ki, bu barədə ABB-nin İdarə Heyətinin sədri Abbas İbrahimov özünün sosial media hesablarında yazıb. Onun açıqlamasına görə, ABB-nin potensial səhmdarlarının 25%-i gənclərdir. “Gənclərimizin ABB-yə inamı bizim üçün çox dəyərlidir” – İdarə Heyətinin sədri qeyd edib.
Abbas İbrahimov sifarişlərin 85%-dən çox hissəsinin məhz rəqəmsal kanallarda yerləşdirildiyini xüsusi vurğulayıb və “Kapital bazarlarının rəqəmsallaşdırılmasında pionerlik etmək ayrı bir fəxr hissidir” – deyə bildirib.
İdarə Heyəti sədrinin verdiyi məlumata görə, səhmlərə abunə yazılışının 34%-i regionların payına düşür. Ölkə miqyasında maliyyə maarifləndirilməsinin nəticələr verməsi baxımından bu, sevindirici göstəricidir.
