ABŞ Ekvador, Argentina, Salvador və Qvatemaladan idxal olunan banan, qəhvə və digər ərzaq məhsullarına, eləcə də bəzi geyim və tekstil növlərinə tətbiq edilən rüsumları ləğv edəcək. Bu barədə “Reuters”ə adının açıqlanmasını istəməyən Ağ evin yüksək vəzifəli rəsmisi məlumat verib.
Rüsumlar tərəflərin qarşıdakı iki həftə ərzində yekunlaşdırmağı planlaşdırdığı çərçivə razılaşmaları çərçivəsində ləğv ediləcək. Bu razılaşmalar ABŞ şirkətlərinə həmin ölkələrin bazarlarına daha geniş çıxış imkanı verəcək. Bundan əlavə, il sonuna qədər əlavə sazişlərin də bağlanması mümkündür.
Gözlənilir ki, razılaşmalar ABŞ-də bu məhsulların qiymətlərinin azalmasına səbəb olacaq. Ağ ev ümid edir ki, ölkənin pərakəndə satış şəbəkələri bu “müsbət effekti” istehlakçılara ötürəcək, deyə administrasiya nümayəndəsi qeyd edib.
ABŞ-nin maliyyə naziri Skott Bessent bu həftənin əvvəlində bəyan etmişdi ki, hökumət yaxın vaxtlarda qəhvə, banan və digər meyvələrin qiymətlərinin azalmasına gətirib çıxaracaq mühüm açıqlamalar verəcək.
Dünyanın ən böyük qəhvə istehsalçısı və ixracatçısı Braziliyadır, lakin bu ölkədən ABŞ-a ixrac edilən qəhvəyə prezident Donald Tramp tərəfindən tətbiq edilmiş 50%-lik rüsumlar qüvvədədir. ABŞ Dövlət Departamenti 14 noyabrda bildirmişdi ki, dövlət katibi Marko Rubio və Braziliyanın xarici işlər naziri Mauro Viyeyra bu həftə ölkələrarası ticarət münasibətlərini müzakirə ediblər.
Tramp oktyabrın sonunda ÇXR sədri Si Cinpinlə danışıqlardan sonra bəyan etmişdi ki, fentanillə bağlı Çinə tətbiq olunan rüsumları 20%-dən 10%-ə endirir. Nəticədə ümumi rüsum dərəcəsi 57%-dən 47%-ə düşəcək. ABŞ prezidentinin sözlərinə görə, Cənubi Koreyanın Pusan şəhərində keçirilən görüşdə tərəflər “bir çox çox mühüm məsələlər üzrə” razılıq əldə ediblər.
