2024-cü ilin yanvarında ABŞ-də evsizlərin sayı 2023-cü ilin yanvar ayı ilə müqayisədə 18% artıb. Mənzil və şəhərsalma departamentinin məlumatına görə, ölkədə 771 480 nəfər evsiz hesab olunur. Bu, rekord göstəricidir.
Məlumata görə, hər 10 min nəfərə 23 evsiz düşür. Uşaqlı ailələrdə evsizlərin sayı 39% artaraq 259.5 min nəfərə çatıb: “Bu məlumatların artıq köhnəlməsinə və mövcud vəziyyəti əks etdirməməsinə baxmayaraq, evsizliyin qarşısının alınması və aradan qaldırılması üçün səylərə diqqət yetirmək üçün son dərəcə vacibdir. “, – departamentin bəyanatında deyilir.
Evsizliyin artması inflyasiya, yüksək mənzil qiymətləri, orta və aşağı gəlirli ev təsərrüfatları arasında əmək haqqının durğunluğu və sistemli irqçiliyin davamlı təsirləri ilə əlaqələndirilir. Digər amillərə insanları köçkün etmiş təbii fəlakətlər, miqrasiyanın artması və koronavirus pandemiyası zamanı tətbiq edilən evsizliyin qarşısının alınması proqramlarının sona çatması daxildir.
