ABŞ son bir neçə onillikdə ilk dəfə kömür və qazla işləyən elektrik stansiyalarına kapital qoyuluşlarının həcminə görə dünyada lider olub. Beləliklə, Vaşinqton uzun illər bu sahədə birinci yeri qoruyan Çini qabaqlayıb.
Beynəlxalq Enerji Agentliyinin proqnozuna görə, ABŞ 2026-cı ildə kömür və qaz elektrik stansiyalarının tikintisinə təxminən 50 milyard dollar xərcləyəcək. Financial Times yazır ki, bu, Çinin sərmayə qoyuluşundan 3 milyard dollar çoxdur.
ABŞ uzun fasilədən sonra istilik generasiyası sektorunda liderliyi yenidən ələ keçirir. Sonuncu dəfə ölkə bu istiqamətdə investisiyalara görə digər dövlətləri bir neçə onillik əvvəl qabaqlamışdı.
Sərmayələrin artması elektrik enerjisinə tələbatın kəskin yüksəlməsi ilə bağlıdır. Beynəlxalq Enerji Agentliyinin məlumatına görə, ölkəyə data mərkəzlərini və qaz turbinlərini enerji ilə təmin etmək üçün daha çox istehsal gücü lazımdır.
ABŞ vitse-prezidenti Cey Di Vens daha əvvəl bildirmişdi ki, Çin süni intellektin inkişafında ABŞ-ni məhz data mərkəzləri üçün enerji güclərini fəal şəkildə artırdığına görə qabaqlayır. Onun sözlərinə görə, ABŞ-nin irəliləyişini ekoloji hərəkat məhdudlaşdırır.
“Mən hesab edirəm ki, çinlilər süni intellekt sahəsində bizi yalnız bir məsələdə qabaqlayırlar — onlar tikinti aparmaqdan qorxmurlar”, — Vens jurnalist Maykl Noulza müsahibəsində deyib.
Çin uzun müddət istilik elektrik generasiyasına investisiyaların həcminə görə lider olub. İndi isə hər iki ölkənin energetika sektorundakı investisiya fəallığının dəyişməsi fonunda Çin bu mövqeni ABŞ-yə verib.
