ABŞ-də iyulun 10-dan 17-dək neft hasilatı sutkada 63 min barel azalaraq 13,798 milyon barelə düşüb. Eyni dövrdə ölkənin neft ehtiyatları 2 milyon barel artıb. Bu barədə ABŞ Energetika Nazirliyinin Enerji İnformasiyası Administrasiyasının (EIA) həftəlik hesabatında bildirilir.
İyulun 3-dən 10-dək ABŞ-də gündəlik neft hasilatı 13,861 milyon barel təşkil edib. Son dörd həftə üzrə orta göstərici isə sutkada 13,832 milyon barel olub.
Kommersiya neft ehtiyatları 2 milyon bareldən bir qədər çox artaraq 411 milyon barelə çatıb. Benzin ehtiyatları 765 min barel, distillat ehtiyatları isə 1,4 milyon barel yüksəlib.
Bununla yanaşı, ABŞ nefti Vaşinqton və Tehran arasında münaqişənin yenidən alovlanması ilə bağlı xəbərlər fonunda bahalaşmaqda davam edir. Bu gün Brent markalı neftin qiyməti son bir ayda ilk dəfə 94 dolları ötüb. Ötən həftə isə neft qiymətləri 16% artıb ki, bu da mart ayından bəri ən böyük həftəlik yüksəliş olub.
