“The Wall Street Journal” (WSJ) mənbəyə istinadən yazır ki, ABŞ və Ukrayna nümayəndələri arasında Berlində keçirilən danışıqlar “çətin” olub. Mənbənin sözlərinə görə, Amerika tərəfi sülh sazişi layihəsi üzrə “kompromisə getməyə meylli görünmür”.
Danışıqlar beş saat davam edib və bu gün də davam etdiriləcək, onlara bir sıra Avropa liderləri də qoşulacaq. WSJ-nin yazdığına görə, Vaşinqton qərarın mümkün qədər tez qəbul edilməsində israr edir, Zelenski və onun müttəfiqləri isə “həllini tapmalı olan ciddi fikir ayrılıqlarının qalmaqda davam etdiyini” bildirirlər.
Nəşr qeyd edir ki, sülh planının bəzi bəndləri üzrə razılıq əldə olunub — xüsusilə Ukrayna Silahlı Qüvvələrinin sayının 800 min nəfərlə məhdudlaşdırılması məsələsində. Lakin Kiyev Vaşinqtonun Ukrayna ordusunun nəzarətində olan DNR ərazilərindən çıxması tələbinə qarşı çıxmaqda davam edir. WSJ əlavə edir ki, Avropa və Ukrayna rəsmiləri ABŞ-ın “Rusiya sülh razılaşmasını pozaraq Ukraynaya hücum edərsə, hansı addımları atacağı” ilə bağlı aydın cavab almaq istəyirlər.
Berlindəki danışıqlarda ABŞ prezidentinin xüsusi elçisi Stiv Uitkoff və Donald Trampın kürəkəni Cared Kuşner iştirak edir. Stiv Uitkoff bildirib ki, Vaşinqton və Kiyev sülh planının müzakirəsində “əhəmiyyətli irəliləyiş” əldə ediblər. Tərəflər 20 maddədən ibarət sənədi nəzərdən keçiriblər, lakin məmur onun detalları barədə məlumat verməyib.
