Ağa Yusif Dadaşov azərbaycanlı milyonçu və xeyriyyəçi idi. O Stokholm Universitetini (İsveçrə) yüksək qiymətlər ilə bitirmiş, rus, fransız və digər avropa dillərinə mükəmməl şəkildə yiyələnmişdi. Bundan əlavə, çar Rusiyasının həqiqi dövlət müşaviri olmuşdur.
Gəmiçilik ticarətindən əldə edilən gəlirlərin əsas hissəsi əhalinin maarifləndirilməsi istiqamətində (Qori Müəllimlər Seminariyası və “Qız məktəbi”) sərf edilirdi. Ağa Yusif Dadaşov bundan əlavə, Bakı-Batumi neft kəmərinin çəkilməsini, Bakı Dumasının inşasını, həmçinin M.Qorki, D. Mendeleyev və neft geoloqu İ.M.Qubkinin Bakıya səfərini maliyyələşdirmişdir. Azərbaycan maddi mədəniyyətinin və abidələrin qorunub saxlanmasında fəal olaraq iştirak edən Ağa Yusif Dadaşov Bibiheybət məscidini bərpa etdirmiş, həmçinin Moskvada inşa edilmiş məscidə yüz lampalı çılçıraq və qiymətli xalçalar hədiyyə etmişdi.
1918-ci ilin mart ayında Bakıda törədilən soyqırım zamanı Dadaşov milli hökumətin qurulmasına maliyyə yardımı göstərmiş, öz dəstəsi ilə birgə ermənilərə qarşı silahlı mübarizə aparmışdır. Özləri tərəfindən Rusiyaya silah ardıyca göndərilən gəmini qarşılamağa gedən Dadaşov geri döndükdə S.Lalayanın daşnak qrupu ilə qarşılaşır. Lalayanın onun qılıncının altından keçməsi tələbinə Dadaşov belə cavab verir: “Mən türkəm. Türk ölər, lakin heç vaxt erməninin qılıncının altından keçməz”. Qəzəblənmiş ermənilər ona işgəncələr verərək qətlə yetirirlər. Dadaşovu qətlə yetirən ermənilər onun brilyant və digər qiymətli daşlarla bəzədilmiş pencəyini ələ keçirirlər. Qeyd edək ki, Ağa Yusif Dadaşovun qəbri hələ də tapılmayıb.
