Avropa ölkələri iyulun 14-də Rusiyaya qarşı 18-ci sanksiyalar paketi, o cümlədən Rusiya neftinin tavan qiymətinin azaldılması ilə bağlı razılığa gəlməyi gözləyirlər.
Sanksiyalar razılaşdırılarsa, tədbirlər paketi ertəsi gün xarici işlər nazirlərinin Brüsseldə keçiriləcək görüşündə rəsmi olaraq qəbul ediləcək.
Razılaşdırılmış qərarlar arasında Rusiya nefti üçün dinamik qiymət tavanının yaradılması mexanizmi də var. Təklifə əsasən, qiymət son altı ayda xam neftin orta bazar qiymətindən 15% aşağı olacaq.
“Reuters”in məlumatına görə, ilkin tavan qiymət bir barel üçün təxminən 47 dollar təşkil edəcək. Aİ-nin 18-ci sanksiyalar paketinə “Şimal axını 1” və “Şimal axını 2” qaz kəməri infrastrukturundan istifadəyə qadağa daxildir. İyunun 27-də Slovakiyanın Baş naziri Robert Fiko yeni sanksiyaların tətbiqinə veto qoyub, iyulun 4-də isə ölkənin Aİ-dəki səfiri veto hüququndan istifadə edib.
