Avropa İttifaqına (Aİ) üzv ölkələr ilkin təklifdən demək olar ki, üçdə bir aşağı olan qazın qiymətinin tavanını müzakirə edəcəklər. “Bloomberg” xəbər verir ki, Aİ-yə sədrlik edən Çexiya hökuməti ötən ay Avropa Komissiyasının təklif etdiyi 275 avro ilə müqayisədə MVt/saat üçün tavan həddini 188 avroya endirməyi təklif edib.
Banker.az bu barədə “Kommersant”a istinadən xəbər verir.
Təklif energetika nazirləri tərəfindən dekabrın 19-da keçiriləcək iclasda müzakirə olunacaq. Çexiyanın təklifinə görə, Avropanın ən böyük qaz qovşağı TTF-nin indeksi üzrə bir ay və ya bir il irəlidə olan müqavilələr üç gün ərzində 1 MVt/saat üçün 188 avronu keçdikdə, qaz bazarının korreksiyası mexanizmi işə düşəcək.
Dekabrın 15-də Aİ sammitində qazın qiymətinin yuxarı həddi ilə bağlı razılıq əldə olunmayıb.
“Politico” daha əvvəl bildirmişdi ki, məhdudiyyətlər dünyanın ən böyük birjası olan ICE-ni “yararsız” etmək təhlükəsi yaradır. Xüsusilə qazın qiymətinin tavanı ideyası Hollandiya hökuməti tərəfindən son dərəcə mənfi qarşılanıb.
