Avropa İttifaqı Şurası Ukraynadan ixraca qoyulan bütün tariflərin və kvotaların ləğvini bir il müddətinə uzadıb. Bu barədə Avropa Bürosunun bəyanatında deyilir. Nümayəndəlik aydınlaşdırıb ki, belə bir tədbir Ukrayna taxılının Bolqarıstan, Macarıstan, Polşa, Rumıniya və Slovakiyaya ixracına mayın əvvəlində tətbiq edilən qadağaya şamil edilmir.
“Aİ Şurası Ukrayna ixracına dair bütün gömrük rüsumlarının, kvotaların və qoruyucu ticarət tədbirlərinin ləğvinin daha bir il, 2024-cü ilin iyun ayına qədər uzadılmasına dair qətnaməni təsdiqləyib”, – mesajda deyilir.
Şərqi Avropa ölkələrinə taxıl ixracı ilə bağlı problemlər bu ilin yazında başlayıb. Aprel ayında bir sıra Şərqi Avropa ölkələri Ukrayna taxılının öz ölkələrinə idxalına müvəqqəti qadağa qoyub.
Avropa Komissiyasının prezidenti Ursula fon der Leyen Bolqarıstan, Macarıstan, Polşa, Rumıniya, Slovakiya və Çexiya hökumətlərinə Brüsselin Aİ fondlarından bu ölkələrin fermerləri üçün “100 milyon avroluq yeni dəstək paketi hazırladığını” bildirib. Mayın 2-də Avropa Komissiyası (AK) Ukraynadan Bolqarıstan, Macarıstan, Polşa, Rumıniya və Slovakiyaya taxıl ixracına qadağa qoyub, lakin onun tranzitinə və digər Aİ ölkələrinə ixracına icazə verib.
