“Alibaba Group Holding”in Honq-Konqdakı səhmləri sentyabrın 1-də 19.3 faiz artaraq 138 Honq-Konq dollarına (17.7 ABŞ dolları) çatıb. “Bloomberg” qeyd edir ki, “Alibaba”nın kotirovkalarındakı bu artım 2022-ci ilin noyabrından bəri ən böyük olub və şirkətin kapitallaşmasını 50 milyard dollar yüksəldib.
“Alibaba” səhmləri şirkətin süni intellekt gəlirlərinin kəskin artdığını bildirdikdən sonra artıb. İyun ayında başa çatan maliyyə rübü üzrə hesabatında şirkət bulud hesablama bölməsi “Alibaba Cloud”dan əldə etdiyi gəlirin illik müqayisədə 26% artaraq 33.4 milyard yuana çatdığını açıqlayıb.
Ümumilikdə, “Alibaba”nın gəliri 2% artaraq 247.65 milyard yuana (34.73 milyard dollar) çatıb ki, bu da analitiklərin gözləntilərindən aşağıdır. Eyni zamanda, şirkətin xalis mənfəəti proqnozları üstələyib və 78% artım göstərərək 43.12 milyard yuana çatıb. Hesabatın dərcindən sonra “Alibaba”nın ABŞ-də depozitar qəbzləri avqustun 29-da cümə günü 12.9% artaraq 135 dollara çatıb.
“Bloomberg”in yazdığı kimi, süni intellektə xüsusi diqqət ayıran “Alibaba” onlayn ticarətdən daha çox asılı olan rəqiblərini asanlıqla ötüb. Süni intellektdən əldə edilən gəlirdə güclü artım “Alibaba”nın təkcə pərakəndə dominantlığına deyil, texnologiyada uzunmüddətli aktuallığa diqqət yetirdiyini göstərir.
