Almaniya və İtaliyada ABŞ-də saxlanılan qızıl ehtiyatlarının repatriasiyası üçün çağırışlar artır. Bu, yerli siyasətçilərin Donald Trampın ABŞ-nin Federal Ehtiyatlar Sisteminə (FED) “hücumlarına” və onun hərəkətləri nəticəsində yaranan geosiyasi qeyri-sabitliyə verdiyi reaksiyadır, bu barədə “Financial Times” yazıb.
Ümumdünya Qızıl Şurasının məlumatına görə, Almaniya və İtaliya ABŞ-dən sonra dünyada ikinci və üçüncü ən böyük milli qızıl ehtiyatlarına malik ölkələrdir. Onların ehtiyatları müvafiq olaraq 3.3 min ton və 2.5 min ton təşkil edir.
Hesablamalara əsasən, iki ölkənin ABŞ-də saxlanılan qızılın bazar dəyəri 245 milyard dollardan çoxdur. Almaniyada siyasi spektr boyunca bir çox siyasətçi, artan geosiyasi risklər fonunda milli sərvətin qorunması üçün bu ehtiyatların ölkəyə qaytarılmasını tələb edib.
“Biz Trampın FED-in müstəqilliyinə xələl gətirməsindən çox narahatıq”, – deyə Avropa Vergi Ödəyiciləri Assosiasiyasının prezidenti Mixael Eqer bildirərək, alman və italyan qızıllarını “vətənlərinə” qaytarmağı tövsiyə edib.
