Apple səhmləri süni intellektlə bağlı bazar dalğalanmalarından ən az təsirlənən aktivlərdən biri kimi görünür. Bu barədə Bloomberg yazır. Şirkətin kotirovkalarının Nasdaq 100 indeksi ilə 40 günlük korrelyasiyası son 20 ilin minimumuna enib. Bu, süni intellektin bir sıra sektorlarda ənənəvi biznes modellərini sıxışdıracağı ilə bağlı narahatlıqlar fonunda ABŞ fond bazarında baş verən kütləvi satışlar zamanı qeydə alınıb.
Bloomberg-in bazar məlumatlarına istinadən verdiyi məlumata görə, ötən həftə Apple səhmlərinin Nasdaq 100 ilə 40 günlük korrelyasiyası 0,21-ə qədər azalıb. Bu, 2006-cı ildən bəri ən aşağı göstəricidir. Agentlik qeyd edir ki, bu amil süni intellektlə bağlı qeyri-müəyyənlik fonunda Apple səhmlərini investorlar üçün daha cəlbedici edir.
Korrelyasiya göstəricisi şirkət səhmlərinin indekslə nə dərəcədə eyni istiqamətdə hərəkət etdiyini göstərir. 1 dəyəri tam sinxron dinamika, -1 isə tam əks istiqamətdə hərəkət deməkdir. May ayında Apple üçün bu göstərici 0,92 idi və sonradan azalmağa başlayıb. Bloomberg-in qeyd etdiyi kimi, şirkət bir sıra rəqiblərindən fərqli olaraq süni intellektə böyük investisiya yarışına qoşulmayıb.
Fevralın əvvəlindən etibarən Apple səhmləri 1,7% bahalaşıb, halbuki Nasdaq 100 indeksi 3,2% geriləyib. “Möhtəşəm yeddilik” şirkətlərinin dinamikasını əks etdirən Bloomberg indeksi isə eyni dövrdə 7,2% azalıb ki, bu da 2025-ci ilin martından bəri ən zəif aylıq nəticədir.
Son dövrlər ABŞ fond bazarında süni intellekt mövzusu ilə bağlı genişmiqyaslı satışlar müşahidə olunub. Anthropic də daxil olmaqla bir sıra şirkətlər müxtəlif sahələrdə tapşırıqları avtomatlaşdıran süni intellekt alətləri təqdim ediblər. Nəticədə investorlar əvvəlcə proqram təminatı istehsalçılarının, daha sonra isə sığorta brokerlərinin, daşınmaz əmlak üzrə konsaltinq şirkətlərinin, aktivlərin idarə edilməsi şirkətlərinin və digər sahələrin səhmlərini sürətlə satmağa başlayıblar.
Treyderlər eyni zamanda korporasiyaların süni intellektə yönəltdiyi yüz milyardlarla dollar həcmində xərclərin özünü doğruldub-doğrultmayacağı ilə bağlı da narahatdırlar.
Bloomberg qeyd edir ki, Apple hər iki ssenaridən kənarda qalır. Şirkət süni intellekt üzrə kapitallaşma bumunda aktiv iştirak etmir və Anthropic kimi şirkətlərin alətlərindən zərər görə biləcək iri biznes istiqaməti yoxdur.
Baxmayaraq ki, Apple əvvəllər süni intellekt texnologiyalarının məhsullarına inteqrasiyasında çətinliklərlə üzləşib, fevral ayında şirkət süni intellekt imkanlarına malik üç yeni portativ cihazın – ağıllı eynəklər, kulon və AirPods qulaqcıqlarının – hazırlanmasını sürətləndirdiyini açıqlayıb. Bundan əlavə, son rüblük hesabat gözləntilərdən daha yaxşı olub və yeni iPhone xəttinin satışları bazarı müsbət təəccübləndirib.
B. Riley Wealth şirkətinin baş bazar strateqi Art Hoqan hesab edir ki, Apple-ın Nasdaq 100 ilə minimal korrelyasiyası hazırda tam müsbət amildir. O, fond bazarındakı vəziyyəti “köstəbəyi vur” oyununa bənzədib: investorlar süni intellektin növbəti hansı sahəyə zərər vuracağından ehtiyat etdikləri üçün əvvəlcə səhmləri satır, sonra vəziyyəti təhlil edirlər. Hoqanın fikrincə, süni intellekt təsirindən nisbətən qorunan səhmlər arasında Apple ön sıradadır.
Bununla belə, Bloomberg qeyd edir ki, Apple da volatillikdən tam sığortalanmayıb. Məsələn, 11 fevralda agentlik şirkətin Siri virtual köməkçisinin yenilənməsini təxirə sala biləcəyi barədə məlumat yayımladıqdan sonra səhmlər 5% ucuzlaşıb. Digər problem isə süni intellekt şirkətlərinin artan tələbi səbəbindən yaddaş çiplərinin qiymətinin yüksəlməsidir. Üstəlik, Apple-ın maliyyə göstəricilərinin artım tempi digər texnoloji şirkətlərlə müqayisədə zəifdir.
Phoenix Financial Services şirkətinin baş bazar analitiki Ueyn Kaufman hesab edir ki, Apple səhmləri artıq ucuz görünmür. Hazırda şirkət P/E (qiymət/gəlir) əmsalı üzrə 30 səviyyəsində ticarət olunur ki, bu da “Möhtəşəm yeddilik” şirkətləri arasında Tesla istisna olmaqla ən yüksək göstəricidir.
Buna baxmayaraq, Kaufman bazarın Apple-a etimadını qoruyacağını düşünür. Onun fikrincə, aparat təminatı sahəsində risklər proqram təminatı ilə müqayisədə daha azdır. “Üstəlik, süni intellektdən istifadə edib yeni iPhone-u öz-özünə proqramlaşdırmaq mümkün deyil”, – deyə Kaufman bildirib.
