Pandemiyanın ikinci dalğası səbəbindən qlobal iqtisadiyyatın trayektoriyası W-şəkilli ssenarini təqib edə bilər.
Banker.az xarici KİV-ə istinadən xəbər verir ki, bu barədə “Barclays” bankının analitikləri məlumat veriblər. Ekspertlərin qeyd etdiyi kimi, koronavirusa yoluxma hallarının artması W-şəkilli ssenari üçün şərait yarada bilər ki, bu da iqtisadi fəallığı cari ilin ikinci rübünün səviyyəsinə endirəcək. “Barclays”ın proqnozuna görə, 2020-ci ilin sonuna qədər qlobal iqtisadiyyat əvvəlki ilə nisbətən 3,6% azalacaq və 2021-ci ildə 5% artacaq.
Analitiklər hesab edirlər ki, pandemiya səbəbindən xüsusilə Qərb ölkələri böyük risk altına düşür. Proqnozlara görə, Avrozonanın ÜDM-si bu il 6,9% azalacaq, gələn il isə 4,7% artacaq. Bu, Beynəlxalq Valyuta Fondunun Avrozona üçün hazırladığı ssenaridən daha müsbət görünüşdür (2020-ci ildə 8,3% azalma, 2021-ci ildə 4,7% artım).
Məruzədə qeyd olunur ki, Avropa Mərkəzi Bankı Avropa iqtisadiyyatına, o cümlədən aktivlərin alışı yolu ilə daha böyük dəstək verməlidir. Bank dəstəyinin olmaması iqtisadi aktivliyin və deflyasiyanın yavaşlamasına səbəb ola bilər. Eyni zamanda Avropa Birliyi 2021-2027-ci illəri əhatə edən 750 milyard avro yardım paketini qəbul etməlidir.
Hesablamalara görə, 2020-ci ilin dördüncü rübündə ABŞ iqtisadiyyatı 2,5% böyüyəcək. Yaponiyanın ÜDM-si 5,7%, Çinin ÜDM-si isə 9,5% təşkil edəcək.
Ekspertlər Çində ÜDM-nin real artımının keçən il ilə müqayisədə 2,3% təşkil edəcəyini proqnozlaşdırırlar.
