Treydərlər yaxın vaxtlarda neft qiymətlərinin yüksək səviyyədə qalacağını gözləyirlər. Bu, dünya neftinin 20%-dən çoxunun daşındığı strateji marşrut olan Hörmüz boğazı vasitəsilə tədarükdə fasilələr yaranması riskləri ilə bağlıdır. Yaxın Şərqdə münaqişənin kəskinləşməsi vəziyyəti daha da gərginləşdirir.
İsrail və ABŞ-nin İran obyektlərinə endirdiyi zərbələrdən sonra hücumlar bütün Fars körfəzi regionuna yayılıb. İranın dövlət mediası İslam İnqilabı Keşikçiləri Korpusunun nümayəndəsinin boğazı bağlamaq niyyəti barədə danışdığını və boğazdan keçməyə cəhd edən gəmilərə hücumların mümkünlüyü barədə xəbərdarlıq etdiyini bildirib.
“JP Morgan” proqnozlaşdırır ki, Hörmüz boğazı bağlı qalarsa, İraq və Küveytdən xam neft tədarükü bir neçə gün ərzində dayandırıla bilər. Bu isə gündəlik 4,7 milyon barelə qədər neftin bazardan çıxmasına səbəb ola bilər.
“ANZ Bank” 2026-cı ilin birinci rübü üçün Brent markalı neftin orta qiyməti ilə bağlı proqnozunu bir barel üçün $90-a yüksəldib. Bank həmçinin mayeləşdirilmiş təbii qaz (LNG) üzrə proqnozunu bir milyon Britaniya istilik vahidi üçün $17-yə qaldırıb.
“Goldman Sachs” da öz proqnozlarını yeniləyib. Bankın hesablamalarına görə, 2026-cı ilin ikinci rübündə Brent markalı neftin orta qiyməti bir barel üçün $76 olacaq ki, bu da əvvəlki proqnozdan $10 yüksəkdir. WTI markalı neft üzrə proqnoz isə $71-ə yüksəldilib (əvvəlki qiymətləndirmədən $9 çox). 2026-cı ilin dördüncü rübü üçün də proqnozlar yenilənib: Brent üzrə $66, WTI üzrə isə $62.
Son iki ticarət sessiyası ərzində Brent və West Texas Intermediate markalı neftin qiymətləri təxminən 5% və daha çox artıb.
