Böyük Britaniyanın Azərbaycanda qızıl, gümüş və mis hasilatı ilə məşğul olan “Anglo Asian Mining Plc.” (AAM) şirkəti cari ilin may ayında Daşkəsən rayonunda yerləşən “Gilar” qızıl yatağında tammiqyaslı hasilata başlamağı planlaşdırır.
Bu barədə şirkətin məlumatına istinadən xəbər verir.
“Gilar” mədənində ilk filiz cari ilin mart ayında hasil edilib, tam həcmdə hasilata isə mayda başlanılacaq”, – məlumatda bildirilib.
Hasilat “Gilar” yatağında “4-cü Zona”da aparılır, burada filiz ehtiyatları 2,4 milyon ton həcmində qiymətləndirilir. Filizdə misin miqdarı 1,47 %, qızılın miqdarı isə 1,78 q/t təşkil edir.
Daha əvvəl verilən məlumata görə, şirkət yaxın aylarda “Gilar”da istehsalı tədricən artırmağı və aylıq 50-60 min ton filiz hasilatına nail olmağı planlaşdırır. 2025-ci ildə AAM yataqdan təxminən 400 min ton filiz hasil etməyi nəzərdə tutur.
AAM həmçinin bildirib ki, martın 31-i tarixinə ümumi dəyəri 7,1 milyon ABŞ dolları olan satılmamış qiymətli metal ehtiyatlarına malikdir. Şirkətin nağd pul vəsaitlərinin həcmi 12,5 milyon ABŞ dolları (31 dekabr 2024-cü il tarixinə 7,1 milyon ABŞ dolları), xalis borcu isə 8,8 milyon ABŞ dolları (31 dekabr 2024-cü il tarixinə 14,8 milyon ABŞ dolları) təşkil edib.
“Gilar” yatağı Gədəbəy müqavilə sahəsində şirkətin emal obyektlərindən təxminən 7 km məsafədə yerləşir. Yatağın JORC standartı üzrə ümumi mineral ehtiyatları 54 min ton mis və 255 min unsiya qızıl təşkil edir.
Strateji inkişaf planına əsasən, AAM 2029-cu ilə qədər orta səviyyəli çoxprofilli mis və qızıl istehsalçısına çevrilməyi planlaşdırır. Həmin vaxta qədər mis şirkətin əsas məhsulu olacaq və hasilat təxminən 50-55 min ton həcmində proqnozlaşdırılır. AAM bu artıma 2025-2029-cu illərdə “Zəfər”, “Gilar”, “Xarxar” və “Qaradağ” yataqlarında dörd yeni mədənin istismara verilməsi hesabına nail olmaq niyyətindədir.
Xatırladaq ki, hazırda “Anglo Asian Mining” “Gədəbəy” və “Qoşa” müqavilə sahələrindən qiymətli metal hasil edir. 1997-ci il avqust ayının 21-də imzalanan Production Sharing Agreement (PSA) tipli müqavilə 6 yatağın işlənməsini nəzərdə tutub. Müqavilədə Azərbaycanın payı 51 %, “Anglo Asian Mining PLC” şirkətinin payı 49 % təşkil edir. Hazırda şirkət Azərbaycanda 8 müqavilə sahəsini işləmək hüququna malikdir.
