“Əgər OPEC+ anlaşması uzadılmasa, neft qiymətləri dərhal düşəcək”.
Bu açıqlamanı İsveçrənin “UBS Bank”ının Honq-Konq şöbəsinin Xammal Departamentinin rəhbəri Dominik Şnayder (Dominic Schnider) verib.
“Düşünürəm ki, OPEC+ anlaşması üzvləri öz öhdəliklərini yerinə yetirəcək və böyük ehtimalla anlaşmanı 3 ay deyil, 6 ay uzadacaq. Bu il neftin qiyməti İran, İraq və Venesuela ilə bağlı gərginliklər fonunda 60 dollar/barelə qədər yüksələ bilər. Əsas problemlər isə 2018-ci ildə yaranacaq. Əgər OPEC+ anlaşması uzadılarsa, neftin orta qiyməti 55 dollar/bareldə qala bilər. Əks halda, neft sürətlə ucuzlaşacaq”, – D.Şnayder qeyd edib.
Bank rəsmisi əlavə edib ki, ABŞ-da 2018-ci ildə neft hasilatının artması ehtimal olunur: “Bu səbəbdən OPEC+ üzvləri anlaşmanı martın sonunda bitirə bilməzlər”.
Rusiya ilə bağlı olaraq D.Şnayder bildirib ki, bu ölkənin 2016-cı ildə nail olduğu tarixi rekord səviyyədə neft hasilatına çatması çətin olacaq. Bu səbəbdən Rusiyanı neft hasilatının həcmi deyil, neftin qiyməti daha çox maraqlandırır.
