İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin vəzifə və funksiyalarını yerinə yetirmək üçün təsərrüfat subyektlərindən və vəzifəli şəxslərdən zəruri məlumatlar, o cümlədən antiinhisar qanunvericiliyinin pozulması ilə bağlı yazılı (şifahi) izahat almaq hüququ olsa da, bunlar bəzən təqdim edilmir.
Bu barədə Dövlət Xidmətindən bildirilib.
“Antiinhisar qanunvericiliyinin pozulması haqqında işlərə baxılması Qaydaları”ndakı son dəyişiklikləri şərh edən qurum bəyan edib ki, bu qaydalara əsasən iş qaldırıla və maliyyə sanksiyaları tətbiq edilə bilər. Buna baxmayaraq, təsərrüfat subyektlərinin müvafiq sənəd və məlumatların təqdim etməməsi hallarına rast gəlinir. Nəticədə Dövlət Xidmətinin apardığı iş üzrə araşdırmanın tam və obyektiv olması məhdudlaşır, həmçinin hüquqları pozulan digər təsərrüfat subyektlərinin hüquqlarının müdafiəsində ciddi maneələr yaranır.
Qeyd olunanlara əsasən, Dövlət Xidməti Nazirlər Kabinetinin 29 may 1998-ci il qərarı ilə təsdiq edilmiş “Antiinhisar qanunvericiliyinin pozulması haqqında işlərə baxılması Qaydaları”nda dəyişiklik edilməsi barədə layihə hazırlayaraq hökumətə təqdim edib. Qəbul olunmuş yeni Qərara əsasən, Dövlət Xidməti sənəd və məlumatları təqdim etməyən təsərrüfat subyektlərinə qarşı məhkəmədə iddia qaldırmaq hüququna malik olub.
Xatırladaq ki, oktyabrın 3-də Nazirlər Kabineti “Antiinhisar qanunvericiliyinin pozulması haqqında işlərə baxılması Qaydaları”nda dəyişiklik edib.
Dəyişikliyə əsasən, sənədin 2.21-ci bəndinə 4-cü bənd əlavə edilib.
Həmin bənddə deyilir ki, antiinhisar siyasəti həyata keçirən qurumun tələb etdiyi sənəd və məlumatlar təqdim edilmədikdə onun məhkəməyə müraciət etmək hüququ yaranır.
Baş nazir Əli Əsədovun imzaladığı dəyişikliklə həmçinin antiinhisar qurumundan məhkəməyə müraciət edilməsi şərtləri də dəyişib. Belə ki, əvvəllər məhkəməyə müraciət hüququ antiinhisar qurumunun qərar çıxartdığı gündən 6 ay müddətində yaranırdısa, yeni versiyada rəsmi təqdim edildiyi gündən 30 gün müddətində məhkəməyə müraciət etmək imkanı verilir.
