Bloomberg mənbələrinin verdiyi məlumata görə, Apple Vyetnamda istehsal imkanlarını genişləndirəcək. Şirkət yerli zavodlarda yeni xətt üzrə “ağıllı ev” cihazları — məişət texnikasının idarə edilməsi üçün ekran, müşahidə kameraları və masaüstü mobil robot istehsal edəcək. Sonuncunun 2027-ci ildə satışa çıxarılması planlaşdırılır.
Nəşrin qeyd etdiyi kimi, Apple istehsal taktikasını dəyişib, belə ki, əvvəllər yeni məhsullar əvvəlcə Çində hazırlanırdı, sonra isə istehsal digər ölkələrə köçürülürdü.
Vyetnamda şirkət Çin elektromobil istehsalçısı BYD ilə əməkdaşlıq edəcək. O, cihazların yekun yığılmasına, sınaqlarına və qablaşdırılmasına cavabdeh olacaq.
Apple-ın baş direktoru Tim Kuk 2025-ci ilin mayında CNBC-yə müsahibəsində bildirib ki, şirkət artıq Vyetnamda iPad, Mac, Apple Watch, AirPods və köhnə HomePod modellərinin əksər hissəsini istehsal edir. Apple həmçinin yerli tədarük zəncirində çalışan işçilər üçün avtomatlaşdırma və proqramlaşdırma üzrə təlim kurslarının sayını artırmağı planlaşdırır.
ABŞ hökumətinin ölkəyə qarşı tətbiq etdiyi 20%-lik tariflərə baxmayaraq, Vyetnamın ÜDM-i 2025-ci ilin üçüncü rübündə ötən ilin eyni dövrü ilə müqayisədə 8,23% artıb. Bloomberg qeyd edir ki, bu göstərici son üç ilin ən sürətli iqtisadi artımıdır.
