“Apple” yeni iOS 26 əməliyyat sistemini təqdim edib. Təqdimat tərtibatçılar üçün nəzərdə tutulmuş “Worldwide Developers Conference” çərçivəsində baş tutub.
“Apple” yeni iOS 26 dizaynını şirkətin tarixindəki ən geniş interfeys dəyişikliyi adlandırıb. Əsas və kilid ekranının yenilənmiş interfeysi “Liquid Glass” adını alıb. Eyni zamanda, əməliyyat sistemində nişanları və vidjetləri fərdiləşdirmək üçün yeni funksiyalar ortaya çıxıb.
Kamera tətbiqi artıq çəkiliş rejimini dərhal aktivləşdirmək və qalereyaya daxil olmaq imkanını alıb. “Apple Intelligence” süni intellektinin imkanları genişləndirilib. Real vaxt rejimində tərcümə funksiyası mesajlara, “FaceTime” və zənglərə inteqrasiya olunub. Onun köməyi ilə digər istifadəçilərlə xarici dillərdə ünsiyyət qurmaq mümkün olacaq.
Bundan əlavə, mesajlar bölməsi yenilənib. İstifadəçilər naməlum göndəricilərdən gələn mesajları süzgəcdən keçirə biləcəklər. Onlar xüsusi qovluqda görünəcəklər. Bu cür bildirişlər səssiz rejimdə gələcək. Həmçinin “Apple Maps” tətbiqi yenilənib – artıq süni intellekt marşrutları təhlil edə, mümkün gecikmələr barədə xəbərdar edə və daha rahat marşrutlar təklif edə biləcək.
