“Apple” şirkəti M4 Pro və M4 Max çipləri ilə təchiz edilmiş yeni 14 və 16 düymlük MacBook Pro noutbuklarını təqdim edib. Bu barədə şirkətin saytındakı press-relizdə deyilir.
14 və 16 düymlük modellər qara və gümüşü rəngdə təqdim edilib, “Liquid Retina XDR” displeyi və 12 meqapiksellik “Center Stage” kamerasını alıb. 14 düymlük versiyanın qiyməti 1599 dollardan başlayır, 16 düymlük modelin qiyməti isə 2499 dollar təşkil edir.
Bütün modelləri oktyabrın 30-dan öncədən sifariş etmək mümkündür, çatdırılma noyabrın 8-də başlayacaq.
Bundan iki gün əvvəl, oktyabrın 29-da “Apple” şirkəti əvvəlki versiya ilə müqayisədə iki dəfə kiçik olan və süni intellekt funksiyalarını dəstəkləyən “Mac-mini”ni təqdim edib. M4 çipli “Mac-mini”nin qiyməti 599 dollardan, M4 Pro çipli versiyanın qiyməti isə 1399 dollardan başlayır.
