“Apple” şirkəti 2022-ci ilin ilk təqdimatında yeni məhsullarını nümayiş etdirib. Martın 8-i Amerikanın elektronika istehsalçısı yeni nəsil iPad Air və Mac Studio göstərib.
Banker.az bu barədə xarici KİV-ə istinadən xəbər verir.
Verilən məlumata görə, yeni iPad Air ultrageniş 12 Mp-lik kamera, USB-C və 5G texnologiyası alıb. Qeyd edək ki, yenilik ikinci nəsil Apple Pencil ilə işləyir və qara, boz, çəhrayı, göy, yaşıl və bənövşəyi rənglərdə təqdim olunur. Vurğulandığı kimi, yeni iPad Air planşetinin qiyməti 599 dollar təşkil edir.
“Apple”ın təqdim etdiyi digər yeniliklər arasında Mac Studio kompüteridir. Yenilik 128 Gb operativ yaddaş və 8 Tb-dək SSD ilə təchiz olunub. Korporasiya onun 27 düymlük iMac-dan qat-qat güclü olduğunu iddia edir.
Kompüter ilə birlikdə yeni Mac Studio Displey monitoru təqdim olunub. Displey A13 Bionic prosessoru, Dolby Atmos dinamikləri və 12 Mp kamera ilə təchiz edilib. Mac Studio-nun qiyməti 1.9 min dollar (M1 Max) və 3.9 min dollar (M1 Ultra), Studio Displey-in qiyməti isə 1.5 min dollar təşkil edir.
Satışlar martın 18-i başlayacaq.
