2024-cü ildə Azərbaycandakı kənd təsərrüfatı üzrə ixtisaslaşan fərdi sahibkarlar 10 milyon 490 min manatlıq mənfəət əldə edib ki, bu da 2023-cü illə müqayisədə 7,3% artım deməkdir. Beləliklə, son dörd ilin ən yüksək nəticəsi qeydə alınıb.
Banker.az bunu Dövlət Statistika Komitəsinə istinadən xəbər verir.
Ümumi mənfəət üzrə də analoji dinamika müşahidə olunur. 2023-cü ildə 9 milyon 44 min manat olan bu göstərici 2024-cü ildə 10 milyon 54 min manata çataraq 11,2% yüksəlib.
Satışdan əldə edilən gəlir son illərin ən diqqətçəkən göstəricilərindən biridir. 2023-cü ildə 33 milyon 992 min manat olan satış həcmi 2024-cü ildə 37 milyon 924 min manata yüksələrək 11,6% artım nümayiş etdirib. Bu isə 2021-ci illə müqayisədə təxminən 30%-lik ümumi artımdır.
Fərdi sahibkarlar heyvandarlıq mənfəətində isə artım templəri daha zəifdir. 2023-cü ildə 2 milyon 314 min manat olan göstərici 2024-cü ildə cəmi 1,2% artaraq 2 milyon 341 min manata çatıb. Bu sahədə ardıcıl yüksəliş olsa da, sürət ümumi sektor göstəricilərindən geri qalır.
Məşğulluq göstəricilərində isə fərqli mənzərə müşahidə edilir. 2023-cü ildə 3353 nəfər məşğul olduğu halda, 2024-cü ildə bu rəqəm 3121 nəfərə enib, yəni 6,9% azalma qeydə alınıb. Ən yüksək məşğulluq 2022-ci ildə 3509 nəfərlə təmin olunmuşdu.
