Azərbaycanda aqrar sığorta fəaliyyəti üzrə müstəqil ekspert sertifikatı almaq istəyən namizədlər üçün test imtahanına qeydiyyatı davam edir.
Banker.az Aqrar Sığorta Fonduna istinadən xəbər verir ki, aqrar sığorta ekspertləri sığortalanan təsərrüfatlarda riskləri müəyyənləşdirir, hadisə baş verdikdə isə araşdırır və dəyən zərəri hesablayırlar.
Aqrar sığorta eksperti fəaliyyəti ödənişlidir və göstərdikləri xidmətlərə görə onlara ödəniş edilir. Hadisələrin tezliyindən və ekspertin aktivliyindən asılı olaraq mütəxəssislərin bu fəaliyyətdən aylıq gəlirləri 1000-1500 manat arasında dəyişir.
Qanunvericiliyə əsasən, magistr, bakalavr, orta ixtisas təhsili və peşə təhsili üzrə ümumilikdə 71 ixtisas üzrə mütəxəssislər aqrar sığorta eksperti sertifikatı almaq üçün müraciət edə bilərlər.
Aqrar sığorta eksperti sertifikatı almaq üçün müvafiq ixtisas malik olan mütəxəssislər Aqrar Sığorta Fondunun keçirdiyi təlimləri müvəffəqiyyətlə başa vurmalı və Dövlət İmtahan Mərkəzinin təşkil etdiyi test imtahanında tələb olunan balı toplamalıdır.
Test imtahanında iştirak etmək üçün qeydiyyat sentyabr ayının 18-dən başlayıb və 13 oktyabr saat 12:00-dək davam edəcək. İmtahan 15 oktyabr 2023-cü il tarixində DİM-in Nəsimi rayonu, Abdulvahab Salamzadə küçəsi, 28 (keçmiş Bakı Asiya Universitetinin binası) ünvanında yerləşən binasında xüsusi ayrılmış zallarda kompüter vasitəsi ilə elektron formada keçiriləcəkdir.
Namizədlər DİM-in internet saytında (http://ekabinet.dim.gov.az) “Şəxsi kabinet” yaratmalı, “Aqrar sığorta fəaliyyəti üzrə müstəqil ekspert sertifikatı almaq istəyən namizədlər üçün test imtahanına onlayn qeydiyyat” xidməti vasitəsilə qeydiyyatdan keçməlidirlər.
İmtahanda iştirak ödənişlidir. Namizədlər “Şəxsi kabinet” yaratdıqdan sonra həmin kabinetin pul hesabına imtahanda iştirak üçün tələb olunan 94.40 AZN (ƏDV daxil olmaqla) məbləğində pul vəsaitini əlavə etməlidirlər. Qeydiyyatdan keçmiş imtahanda iştirak etməyən namizədlərin ödədiyi məbləğ geri qaytarılımır.
İmtahan Aqrar Sığorta Fondu tərəfindən təşkil olunmuş təlim proqramına dair açıq və qapalı tipli test tapşırıqlarını əhatə edir. Toplanılması mümkün olan ümumi (maksimal) bal 60-dır. 36 və daha yüksək bal toplamış namizədlər imtahandan müvəffəqiyyətlə keçmiş hesab edilirlər və onlara aqrar sığorta fəaliyyəti üzrə müstəqil ekspert sertifikatının müvafiq növü verilir.
Aqrar sığorta fəaliyyəti üzrə müstəqil ekspert imtahanınında iştirak üçün qeydiyyat linki
