Avropa İttifaqının ən yüksək məhkəmə instansiyası olan Avropa Ədalət Məhkəməsi bu gün, sentyabrın 10-da Amerikanın texnologiya nəhəngi “Apple”ın İrlandiya səlahiyyətliləri ilə qeyri-qanuni razılaşma nəticəsində ödəmədiyi 13 milyard avro vergi ödəməli olduğuna dair qərar çıxarıb. Beləliklə, Aİ-nin ən yüksək məhkəməsi əvvəllər Amerika şirkətinin tərəfində olan aşağı instansiya məhkəməsinin qərarını ləğv edib.
Banker.az bu barədə Kommersant.ru-ya istinadən xəbər verir.
Avropa Məhkəməsinin qərarı hələ 2016-cı ildə başlayan işə aiddir. Daha sonra Avropa Komissiyası İrlandiyanın Amerika şirkətinə vergi güzəştləri vermək qərarını qanunsuz elan edib və “Apple”ın ödənilməmiş vergilərin bütün məbləğini, yəni 13 milyard avronu geri qaytarmalı olduğuna qərar verib.
Ekspertlər qeyd edirlər ki, Avropa Məhkəməsinin hazırkı qərarını dünyanın aparıcı texnologiya şirkətləri diqqətlə izləyir, onların bir çoxu ayrı-ayrı Avropa ölkələri ilə əlverişli vergi sazişləri bağlayıb.
Keçən il ABŞ-nin başqa bir texnologiya nəhəngi “Amazon”, Lüksemburqla vergi münasibətlərinə görə Avropa Məhkəməsində qələbə qazanıb. Lakin o zamanlar söhbət daha kiçik məbləğdən – 25 milyon dollardan gedib.
