Avropa Yenidənqurma və İnkişaf Bankı (AYİB) 2025-ci ildə Azərbaycanda sabit artım proqnozlaşdırır.
Bu barədə AYİB-in məlumatında bildirilib.
Bank 2024-cü ildəki güclü artımın ardından, 2025-ci ildə ÜDM artımını 3 faiz səviyyəsində proqnozlaşdırır.
* 2024-cü ildə Azərbaycanın iqtisadiyyatı güclü dövlət investisiyalarının hesabına 4.1 faiz artıb.
* 2025-ci ildə ÜDM artımının 3 faizə, 2026-cı ildə isə 2.5 faizə qədər azalacağı proqnozlaşdırılır.
* İqtisadi perspektiv neftin qiymətinə və geosiyasi risklərə həssas olaraq qalır.
Azərbaycanın iqtisadiyyatı 2024-cü ildə əhəmiyyətli dərəcədə genişlənib və real ÜDM artımı 2023-cü ildəki 1.1 faizdən 4.1 faizə yüksəlib. Bu barədə Avropa Yenidənqurma və İnkişaf Bankı (AYİB) bu gün özünün son Regional İqtisadi Perspektivlər hesabatında bildirib.
Artım güclü qeyri-neft sektorunun göstəriciləri (6.2 faiz artım) və dövlət investisiyaları hesabına təmin edilib, real gəlir artımı və infrastruktur layihələri isə iqtisadi aktivliyi əlavə dəstəkləyib.
Böhran dövründən sonra neft-qaz sektoru 2024-cü ilin mart ayında bərpa olunub, qaz istehsalı isə artaraq Avropanın yüksələn tələbatını ödəməyə yönəlib.
Eyni zamanda, inflyasiya nəzarət altında qalıb və aprel ayında illik 0 faizlə son doqquz ilin ən aşağı səviyyəsinə enib, ilin sonunda isə 4.9 faiz təşkil edib. Dövlətin qiymət tənzimləmə siyasəti və qlobal ərzaq qiymətlərinin aşağı düşməsi kimi amillər daxili inflyasiyanı stabilləşdirməyə kömək edib və istehlak xərclərini idarəolunan səviyyədə saxlayıb.
Gələcəyə yönəlik proqnozlara əsasən, 2025-ci ildə Azərbaycanın ÜDM artımı 3 faizə, 2026-cı ildə isə 2.5 faizə qədər azalacaq. Bununla belə, ölkənin iqtisadi perspektivi neft və qaz qiymətlərindəki dəyişkənliklərə, eləcə də regional geosiyasi proseslərə qarşı yüksək dərəcədə həssas olaraq qalır.
Orta müddətli perspektivdə Azərbaycan, Çini və Mərkəzi Asiyanı Avropa ilə birləşdirən Orta Dəhliz vasitəsilə artan ticarətdən faydalana bilər. Bundan əlavə, infrastruktur, kənd təsərrüfatı və müdafiə sahələrinə yönəldilən dövlət investisiyalarının dəstəyi ilə ictimai istehlakın artacağı proqnozlaşdırılır.
AYİB Azərbaycanda mühüm institusional investordur. Bu günə qədər Bank ölkə üzrə 190-dan çox layihəyə 4 milyard avrodan çox sərmayə yatırıb və əsas diqqəti iqtisadiyyatın şaxələndirilməsinə və yaşıl iqlim təşəbbüslərinin dəstəklənməsinə yönəldib.
