5 C
Baku
Wednesday, February 21, 2024

AYİB Azərbaycanda internet şəbəkəsinin genişləndirilməsi üçün $50 mln. kredit ayırıb

Dekabrın 22-də “Aztelekom” MMC-nin genişzolaqlı internet şəbəkəsinin genişləndirilməsi layihəsinin maliyyələşdirilməsi ilə bağlı “Aztelekom” MMC və Avropa Yenidənqurma və İnkişaf Bankı (AYİB) arasında 50 milyon ABŞ dolları (85 milyon AZN) dəyərində kredit müqaviləsi imzalanıb.

Banker.az Rəqəmsal  İnkişaf və Nəqliyyat Nazirliyinə istinadən xəbər verir ki, sözügedən kredit müqaviləsini “Aztelekom” MMC-nin baş direktoru Klaus Müller və AYİB-in Şərqi Avropa və Qafqaz ölkələri üzrə idarəedici direktoru Matteo Patron imzalayıblar.

Klaus Müller Azərbaycanın regionlarında təxminən 280 mindən çox ev təsərrüfatına ən müasir genişzolaqlı infrastrukturun tətbiqinə AYİB-in göstərdiyi dəstəyi yüksək qiymətləndirib.

Bildirilir ki, “Aztelekom” cəlb olunan maliyyə vəsaitini regionlarda həyata keçiriləcək infrastrukturun yenidən qurulması üçün istifadə edəcək. Bu maliyyə dəstəyi ilə şirkət planlaşdırdığı şəbəkə genişləndirilməsinin sürət, tutum və ötürmə qabiliyyətini yaxşılaşdıraraq, şəhər və kənd yerləri arasında rəqəmsal bərabərsizliyi azaltmağa nail olacaq.

Məlumat üçün bildirək ki, Rəqəmsal İnkişaf və Nəqliyyat Nazirliyi tərəfindən həyata keçirilən və əsas operatoru “Aztelekom” MMC olan “Onlayn Azərbaycan” layihəsi çərçivəsində 2024-cü ilin sonuna qədər sürətli internetlə ölkənin bütün ərazisini əhatə edən genişzolaqlı şəbəkənin qurulması planlaşdırılır.

Layihə çərçivəsində mövcud ADSL avadanlığının müasir IMS platforması ilə işləyən GPON avadanlıqla əvəz edilməsi, köhnə mis magistral kabel infrastrukturunun optik kabellərlə əvəzlənməsi və optik paylayıcı şəbəkənin qurulması nəzərdə tutulur. Bu texnologiya mühüm dərəcədə internet xidmətinin keyfiyyətini yaxşılaşdırır, eləcə də İPTV və digər əlavə xidmətlər göstərməyə imkan yaradır.

Məlumat üçün bildirək ki, layihənin icrasına başlanıldığı 2017-ci ildən bu günədək artıq ölkə üzrə 766 minə yaxın ev təsərrüfatı optik internetə çıxış imkanı əldə edib ki, bunun da 539 mini 2021-2022-ci illərdə icra olunub. Layihənin sonunadək ölkə ərazisində bütün ev təsərrüfatlarının GPON və digər genişzolaqlı texnologiyalar vasitəsilə sürətli internetlə təmin olunması planlaşdırılır.

Son xəbərlər
Digər xəbərlər