Azərbaycan Sığortaçılar Assosiasiyasının (ASA) təsisçilərin Ümumi Yığıncağının iclasında assosiasiyanın Müşahidə Şurasının yeni tərkibi formalaşdırılıb.
ASA-dan verilən məlumata görə, Müşahidə Şurasına “A-Qroup Sığorta Şirkəti”, “Atəşgah” Sığorta Şirkəti, “Azərsığorta” Dövlət Sığorta Şirkəti, “AzRe Təkrarsığorta”, “AzSığorta”, “İpək Yolu Sığorta”, “Qala Sığorta”, “PAŞA Sığorta” və “PAŞA Həyat Sığorta” ASC-lər daxil edilib.
Səsvermə əsasında formalaşan yeni tərkibdə ilk dəfə olaraq bir həyat sığortası şirkəti də ASA-nın Müşahidə Şurasının üzvlüyünə daxil olub.
İclasda assosiasiyanın 2022-ci il üzrə fəaliyyətinə dair hesabatı təqdim olunub, həyata keçirilən görüş və tədbirlərlə bağlı məlumat verilib.
Bildirilib ki, 2021 və 2022-ci illərdə sığorta bazarında ardıcıl olaraq qeydə alınan 16 % və 15 %-lik böyümənin formalaşmasında ASA-nın müstəsna xidmətləri olub.
İstər dövlət və özəl sektorla sığorta bazarı arasında əlaqələrin qurulması, istərsə də sığorta maarifləndirməsi və qarşısıalınma tədbirləri istiqamətində aparılan məqsədyönlü tədbirlər mövcud böyümənin təmin olunmasında bilavasitə rol oynayıb.
İclasda ASA-nın 2023-cü il üzrə nəzərdə tutulmuş fəaliyyət planı və layihələri barədə məruzə dinlənilib. Fəaliyyət planı Assosiasiyanın təsisçiləri tərəfindən müsbət qarşılanıb.
